ထိုင်းအစိုးရက အနီရောင် နဲ့ ခရမ်းရောင် ရထားလိုင်းတွေအတွက် လက်မှတ်ခနှုန်းထားအသစ်ကို အတည်ပြုလိုက်ပါပြီ။ ဒီဇင်ဘာ ၁ ရက်နေ့ ကနေစပြီး ခရီးသည်တွေ တစ်ရက်တာ ဘယ်လောက်စီးစီး အများဆုံးပေးရမယ့် နှုန်းထားက ဘတ် ၄၀ သာ ဖြစ်ပါတယ်။ လက်ရှိ တစ်နေကုန် ဘတ် ၂၀ စီးနင်းခွင့်ဟာ နိုဝင်ဘာလကုန်မှာ ပြီးဆုံးမှာဖြစ်လို့ ယာယီအစီအစဉ်အသစ်ကို ၂၀၂၅၊ ဒီဇင်ဘာ ၁ ရက်နေ့ကနေ ၂၀၂၆၊နိုဝင်ဘာ ၃၀ အထိ တစ်နှစ်တာ သတ်မှတ်လိုက်တာပါ။
သယ်ယူပို့ဆောင်ရေးဝန်ကြီး ဖိဖတ်က ဒီအစီအစဉ်က ခရီးသည်တွေရဲ့ ကုန်ကျစရိတ်ကို လျှော့ချပေးပြီး ဘန်ဆူး-ရန်ဆစ်၊ ဘန်ဆူး-တလင်းချန်း (အနီရောင်) နဲ့ တောင်ပွန်း-ကလောင်းဘန်ဖိုင် (ခရမ်းရောင်) လိုင်းနှစ်ခုစလုံးကို အကန့်အသတ်မရှိ တစ်နေကုန် စီးနင်းနိုင်တဲ့အတွက် ပိုအဆင်ပြေစေမယ်လို့ ပြောပါတယ်။
သာမန်ခရီးသည်များအနေနဲ့ တစ်ရက်လျှင် ဘတ် ၄၀ သာကျသင့်မှာဖြစ်ပြီး ကျောင်းသားများအနေနဲ့ တစ်ရက်လျှင် ဘတ် ၃၀ သာ ကျသင့်မှာပါ။ သက်ကြီးရွယ်အိုများ အနေနဲ့ကတော့ လက်မှတ်ခ ၅၀% လျှော့စျေး ရရှိမှာ ဖြစ်ပြီး မသန်စွမ်းသူများနဲ့ ကလေးများကတော့ အခမဲ့ စီးနင်းခွင့် ရမှာ ဖြသ်ပါတယ်။ နိုင်ငံတော်လူမှုဖူလုံရေးကတ် ကိုင်ဆောင်သူများအနေနဲ့ တစ်လ ဘတ် ၇၅၀ ထောက်ပံ့ကြေးကို သုံးစွဲနိုင်မှာပါ။
ဒီအထူးနှုန်းထား ဘတ် ၄၀ကို ခံစားခွင့်ရဖို့အတွက် ခရီးသည်တွေဟာ သတ်မှတ်ထားတဲ့ EMV Contactless Card (ဥပမာ- Europay, Mastercard, Visa, MRT EMV ကတ် ဒါမှမဟုတ် Mangmoom EMV ကတ်) တစ်မျိုးမျိုးကို သုံးစွဲမှသာ အကျုံးဝင်မှာ ဖြစ်ပါတယ်။ သယ်ယူပို့ဆောင်ရေး ဝန်ကြီးဌာန၊ ရထားလုပ်ငန်း (SRT) နဲ့ MRTA တို့က အစီအစဉ်မစခင်မှာ ခရီးသည်တွေ အားလုံး နားလည်အောင် EMV ကတ် အသုံးပြုနည်းနဲ့ စည်းမျဉ်းတွေကို ကျယ်ကျယ်ပြန့်ပြန့် ကြေညာပေးသွားမယ် လို့လည်း ထိုင်းသတင်းဌာနတွေက ဖော်ပြပါတယ်။
