မြေနိမ့်ပိုင်းများ ၁၀ ပေကျော်အထိ ရေတက်နိုင်
ထိုင်းနိုင်ငံတောင်ပိုင်းမှာ ရက်ပေါင်းများစွာ ဆက်တိုက်မိုးရွာနေတာကြောင့် ရေကြီးမှုအခြေအနေတွေဟာ အလွန်ဆိုးရွားတဲ့ အဆင့်ကို ရောက်နေပါတယ်။ အဆိုးဆုံး ခံစားနေရတာကတော့ စုန်ခလာပြည်နယ် ဖြစ်ပြီး အရေးပေါ် ကယ်ဆယ်ရေးနဲ့ ရွှေ့ပြောင်းမှုတွေ လုပ်ဆောင်နေရတယ်လို့ သိရပါတယ်။စုန်ခလာမှာ နိုဝင်ဘာ ၁၉ ရက်ကတည်းက စတင်ရေလွှမ်းနေပြီး U-Tapao တူးမြောင်းမှ ရေလျှံကျမှုကြောင့် အခြေအနေ ပိုဆိုးလာကာ ပြည်နယ်ရှိ ခရိုင် ၁၆ ခုလုံး ထိခိုက်နေတာပါ။
စုန်ခလာရဲ့ အဓိကမြို့ဖြစ်တဲ့ ဟတ်ယိုင်မှာ ရေအဆင့် လျင်မြန်စွာ မြင့်တက်နေပြီး မြေနိမ့်ပိုင်းတွေမှာ သုံးမီတာ (၁၀ ပေခန့်) ထက် ကျော်လွန်ဖို့ မျှော်မှန်းထားတာကြောင့် အရေးပေါ် ရွှေ့ပြောင်းအမိန့် ထုတ်ပြန်ထားတယ်လို့ သိရပါတယ်။ စုန်ခလာ ပြည်နယ်တစ်ခုတည်းမှာတင် ရေဘေးသင့်ပြည်သူ အိမ်ထောင်စုပေါင်း ၂၄၃,၀၀၀ ကျော် နဲ့ လူဦးရေ ၆၃၅,၀၀၀ ကျော် ထိခိုက်ခဲ့ပြီး လူ (၁) ဦး သေဆုံးခဲ့တယ်လို့ ထိုင်းသတင်းတွေကဖော်ပြထားပါတယ်။
လူပေါင်း ၁,၂၀၀ ကျော်ကိုလည်း တက္ကသိုလ်တွေနဲ့ စစ်စခန်းတွေရှိ ကယ်ဆယ်ရေးစခန်းတွေကို ရွှေ့ပြောင်းထားရပါတယ်။ စုန်ခလာပြည်နယ် အုပ်ချုပ်ရေးမှူးက စတုတ္ထမြောက် တပ်မတော်နယ်မြေ နဲ့ ပူးပေါင်းပြီး အရေးပေါ် ကွပ်ကဲမှုစင်တာ ဖွဲ့စည်းကာ ကယ်ဆယ်ရေးလုပ်ငန်းတွေကို ညှိနှိုင်းဆောင်ရွက်နေတယ်လို့ ဆိုပါတယ်။ ရေလွတ်ယာဉ် (၈၀) ကျော်၊ လှေ (၆၅) စီးနဲ့ ရွေ့လျားမီးဖိုချောင်များ ကို အသုံးပြုပြီး ကယ်ဆယ်ရေးနဲ့ ရိက္ခာထောက်ပံ့ရေး လုပ်ငန်းများ ဆောင်ရွက်နေတယ်လို့ Thaiger သတင်းအရ သိရပါတယ်။
မိုးလေဝသဌာန ရဲ့ ခန့်မှန်းချက်အရ နိုဝင်ဘာ ၂၅ ရက်နေ့အထိ ဒေသတွင်း မိုးသည်းထန်စွာ ဆက်လက်ရွာသွန်းနိုင်ပြီး တောင်ခြေနဲ့ မြေနိမ့်ပိုင်းတွေမှာ ရုတ်တရက် ရေကြီးမှုနဲ့ မြေပြိုမှု အန္တရာယ် ရှိနေဆဲဖြစ်တယ်လို့ ဆိုပါတယ်။ မုတ်သုံလေ အားနည်းလာနိုင်ပေမယ့် နိုဝင်ဘာ ၂၉ ရက်အထိ မိုးများ ရွာသွန်းနိုင်သေးတာကြောင့် ၂၄ နာရီပတ်လုံး အခြေအနေကို စောင့်ကြည့်သွားဖို့ သတိပေးထားပါတယ်။
