ရုပ်အလောင်း ၂၀ ကျော် မည်သူမှန်း မသိသေး
ဟတ်ယိုင်မှာ မိုးကြီးပြီး ရေလွှမ်းမိုးမှု ဖြစ်ပွားပြီးနောက် နိုဝင်ဘာ ၂၈ ရက်နေ့ နောက်ဆုံးအချက်အလက်တွေအရ သေဆုံးသူ ရုပ်အလောင်း ၁၀၀ ကျော်ကို ရှာဖွေတွေ့ရှိထားတယ်လို့ အမျိုးသားရဲချုပ်ရုံးက အတည်ပြုထုတ်ပြန်လိုက်ကြောင်းသိရပါတယ်။ ဒီအထဲက ရုပ်အလောင်း ၂၀ ကျော်ကိုတော့ ဘယ်သူဘယ်ဝါဖြစ်တယ်ဆိုတာ ခွဲခြားသတ်မှတ်ဖို့ လိုအပ်နေသေးတယ်လို့ ဆိုပါတယ်။အခြေအနေကို စီမံခန့်ခွဲနိုင်ဖို့ ရဲချုပ်ကြီးကိုယ်တိုင်က မှုခင်းဆေးဘက်ဆိုင်ရာ ကျွမ်းကျင်သူတွေနဲ့ ရဲတပ်ဖွဲ့ကို စုံစမ်းစစ်ဆေးရေးအတွက် စေလွှတ်လိုက်ပြီး ရုပ်အလောင်းတွေ သိုလှောင်ဖို့အတွက် အအေးခန်းကားတွေပါ ပံ့ပိုးပေးထားတယ်လို့ သိရပါတယ်။
ဟတ်ယိုင်ရေကြီးမှုကြောင့် ရုပ်အလောင်း အများအပြား လက်ခံရရှိနေရတဲ့ ဆုန်ခလာ နာကာရင် ဆေးရုံ ကလည်း အရေးပေါ် သတိပေးချက်တစ်စောင် ထုတ်ပြန်ခဲ့ပါတယ်။ဆေးရုံရဲ့ အဓိကပြောဆိုချက်တွေအနေနဲ့ ကွယ်လွန်သူ မိသားစုများနဲ့ ထပ်တူ နက်ရှိုင်းစွာ ဝမ်းနည်းကြောင်း ဖော်ပြထားပါတယ်။ ရုပ်အလောင်းတွေကို လက်ရှိအချိန်မှာ မိသားစုများထံ ချက်ချင်း ပြန်လည်ပေးအပ်နိုင်ခြင်း မရှိသေးကြောင်းနဲ့ အမှားအယွင်း မဖြစ်စေဖို့အတွက် အမျိုးသားရဲဌာနက ချမှတ်ထားတဲ့ ဥပဒေလုပ်ထုံးလုပ်နည်းတွေနဲ့အညီ ဘယ်သူဘယ်ဝါဖြစ်တယ်ဆိုတာ တိကျစွာ ခွဲခြားစစ်ဆေးမှုကို အရင်ဆုံး ပြီးစီးအောင် ဆောင်ရွက်ရမှာ ဖြစ်တယ်လို့ ဆိုပါတယ်။
ဒါ့အပြင် သေဆုံးသူစာရင်း မှတ်တမ်းတွေကို အမြန်ဆုံး ပြီးစီးအောင် ဆေးရုံက အားသွန်ခွန်စိုက် လုပ်ဆောင်နေပြီး ရုပ်အလောင်းတွေ ပြန်လည်ထုတ်ယူဖို့ ဆက်သွယ်ရမယ့် လုပ်ငန်းစဉ်အသေးစိတ်ကို ဆေးရုံက မကြာမီ ကြေညာပေးမှာဖြစ်တာကြောင့် ဆွေမျိုးသားချင်းတွေနဲ့ ပြည်သူတွေအနေနဲ့ ဆေးရုံရဲ့ သတင်းထုတ်ပြန်ချက်တွေကို ဆက်လက်စောင့်ကြည့်ပေးဖို့ တိုက်တွန်းထားကြောင်း The Nation သတင်းမှာ ဖော်ပြထားပါတယ်။
