အလုပ်သမားဝန်ကြီးဌာနဟာ အလုပ်သမား ကာကွယ်စောင့်ရှောက်ရေး ဥပဒေကို ပြင်ဆင်ပြီး အလုပ်ချိန်လျှော့ချဖို့နဲ့ ဝန်ထမ်းတွေရဲ့ ခွင့်ရက်၊အားလပ်ရက် အခွင့်အရေးတွေ တိုးမြှင့်ဖို့ စီစဉ်နေတဲ့အပေါ် ထိုင်းစီးပွားရေးနဲ့စက်မှုလုပ်ငန်းရှင်အသင်း (Econ Thai) က စိုးရိမ်မကင်းဖြစ်ကြောင်း ထုတ်ဖော်ပြောဆိုလိုက်ပါတယ်။
Econ Thai ဥက္ကဋ္ဌ ဒေါက်တာ နာဝရတ် စုန်စဝမ် ဦးဆောင်တဲ့ အဖွဲ့ဟာ နိုဝင်ဘာ ၁၇ ရက်နေ့ ညနေ ၂ နာရီမှာ အလုပ်သမားဝန်ကြီး ထရီနုချ်သီယန်ထောင်ထံ စာတင်ပြီး အဆိုပါဥပဒေပြင်ဆင်ချက်ကို ပြန်လည်သုံးသပ်ဖို့ တရားဝင်တောင်းဆိုခဲ့ပါတယ်။ ဒေါက်တာ နာဝရတ်ရဲ့ ပြောကြားချက်အရ အလုပ်ချိန်လျှော့ချပြီး ခွင့်ရက်တွေ တိုးလိုက်မယ်ဆိုရင် ခုလိုအခြေအနေတွေ ကြုံလာနိုင်တယ်လို့ ဆိုပါတယ်။
(၁) အလုပ်ရှင်တွေအတွက် ကုန်ကျစရိတ်တွေ တက်လာမယ်။
(၂) ဝန်ထမ်းတွေအတွက် အလုပ်ချိန်နည်းလို့ ဝင်ငွေတိုက်ရိုက်ထိခိုက်နိုင်တယ်။
(၃) အနာဂတ်မှာ AI ဒါမှမဟုတ် စက်ရုပ်တွေနဲ့ အစားထိုးတာမျိုးလို အလုပ်အကိုင်ပုံစံအသစ်တွေကြောင့် ပြဿနာတွေ ပိုများလာနိုင်တယ်လို့ ဆိုပါတယ်။
ဒီလိုပြောင်းလဲမှုမျိုးကို သေချာစဉ်းစားမလုပ်ဆောင်ရင် အလုပ်ရှင်နဲ့ဝန်ထမ်း နှစ်ဖက်လုံးကို ထိခိုက်စေနိုင်ပြီး လက်ရှိကျင့်သုံးနေတဲ့ ဥပဒေကပဲ လုံလောက်နေပြီလို့ Econ Thai က ယူဆထားပါတယ်။
အလုပ်သမားဝန်ကြီး ကတော့ Econ Thai ရဲ့ အဆိုပြုချက်တွေကို လက်ခံရယူခဲ့ပြီး အထူးသဖြင့် အသေးစားနဲ့အလတ်စားလုပ်ငန်းတွေအပေါ် သက်ရောက်မှုအနည်းဆုံးဖြစ်အောင် သတိထားပြီး ဆောင်ရွက်သွားမယ်လို့ ကတိပေးခဲ့ပါတယ်။ အလုပ်ရှင်နဲ့အလုပ်သမား နှစ်ဦးစလုံးအတွက် သင့်လျော်မျှတတဲ့ အဖြေတစ်ခုရဖို့ ဆက်လက်စဉ်းစားဆုံးဖြတ်သွားမယ်လို့လည်း ပြောကြားသွားပါတယ်။
