လူခေါ်သည့် ဆက်စပ်ဂိုဏ်းများပါ စုံစမ်းမည်
ထိုင်းနိုင်ငံ၊ ကမ်ဖိုင်ဖက်ပြည်နယ်မှာ အထောက်ထားမဲ့ မြန်မာအလုပ်သမား ၅၈ ဦးကို အပြည့်သိပ်တင်လာတဲ့ ပစ်ကပ်ကား လေးစီးကို လုံခြုံရေးအဖွဲ့တွေ ဖမ်းဆီးလိုက်ပါတယ်။ နိုဝင်ဘာလ ၁၈ ရက်နေ့က လမ်းပိတ်စစ်ဆေးရာကနေ ပစ်ကပ်ကား ၄ စီးပေါ် တင်လာတဲ့ ရွှေ့ပြောင်းလုပ်သားတွေနဲ့ သယ်ယူလာတဲ့ ယာဉ်မောင်း ၄ ဦး ဖမ်းဆီးခံဲခဲ့ရတာပါ။ ယာဉ်မောင်းတွေဟာ မြို့ကြီးတွေဆီ ပို့ဆောင်ဖို့ ပြင်ဆင်နေတာလို့ ဝန်ခံခဲ့ပါတယ်။
ဒီစစ်ဆင်ရေးကို ကမ်ဖိုင်ဖက်ပြည်နယ်က တာဝန်ရှိသူတွေ ပူးပေါင်းပြီး ကိုစမ်ဖီနခွန်မြို့နယ်၊ ကလောင်ဝမ်ကျောင် အမျိုးသားဥယျာဉ် ဖြတ်လမ်းမှာ လုပ်ဆောင်ခဲ့တာပါ။ တာ့ခ်ပြည်နယ်ဘက်ကနေ အလုပ်သမားတွေ သယ်လာမယ်ဆိုတဲ့ သတင်းရတာကြောင့် သတ်မှတ်လမ်းကြောင်းမှာ လိုက်လံပိတ်ဆို့ စောင့်ဆိုင်းခဲ့ကြတာ ဖြစ်ပါတယ်။
ဒီအချိန်မှာ အရှိန်ပြင်းပြင်း မောင်းနှင်လာတဲ့ သံသယဖြစ်ဖွယ် Isuzu ပစ်ကပ်ကား ၄ စီးကို တွေ့တာနဲ့ ရဲအဖွဲ့က လိုက်လံဖမ်းဆီးခဲ့ရာ တာ့ခ်ပြည်နယ်က လာတဲ့ ထိုင်းနိုင်ငံသား ယာဉ်မောင်း ၄ ဦးကို ဖမ်းမိခဲ့ပါတယ်။ ကားတွေကို စစ်ဆေးကြည့်တဲ့အခါ ကားခေါင်းခန်းနဲ့ နောက်တွဲတွေမှာ အပေါ်ကဖုံးအုပ်ပြီး အတင်းအကြပ် ဖိသိပ်ထည့်သွင်း သယ်ဆောင်လာတဲ့ မြန်မာနိုင်ငံသား အမျိုးသား ၃၇ ဦး၊ အမျိုးသမီး ၂၁ ဦး ၊ စုစုပေါင်း ၅၈ ဦးကို တွေ့ရှိခဲ့ရတယ်လို့ ဆိုပါတယ်။
ဖမ်းဆီးရမိသူ ယာဉ်မောင်းတွေက မြို့ကြီးတွေကို ပို့ဆောင်ဖို့ လုပ်ကိုင်နေတာလို့ ဝန်ခံခဲ့ပြီး ရဲတပ်ဖွဲ့ကတော့ ဘယ်သူတွေက ငှားရမ်းလဲ၊ ဘယ်နေရာဆီ ပို့ဆောင်ဖို့လဲ ဆိုတာကို ဂိုဏ်းဖွဲ့စည်းမှု ရှိ/မရှိ ဆက်လက် စုံစမ်းစစ်ဆေးနေပါတယ်။ ဖမ်းဆီးရမိတဲ့ မြန်မာအလုပ်သမား ၅၈ ဦးကိုတော့ ကိုစမ်ဖီနခွန် ရဲစခန်းမှာ မှတ်တမ်းယူပြီး ဥပဒေလုပ်ထုံးလုပ်နည်းတွေအရ နေရပ်နိုင်ငံကို ပြန်ပို့သွားမယ်လို့ khaosod သတင်းအရ သိရပါတယ်။
