ထိုင်းနိုင်ငံ၊ ဟတ်ယိုင်မြို့မှာ လက်ရှိ ရင်ဆိုင်နေရတဲ့ ရေဘေးအခြေအနေဟာ တော်တော်လေး ဆိုးရွားနေပြီး မြို့ရဲ့ စီးပွားရေးအချက်အချာကျတဲ့ နေရာတွေဟာ ဒီဇင်ဘာလလယ်အထိ ရေအောက်မှာပဲ ရှိနေနိုင်တယ်လို့ ကျွမ်းကျင်သူတွေက သတိပေးလိုက်ပါတယ်။
ဘေးအန္တရာယ်လျော့ပါးရေးစင်တာ ဒါရိုက်တာ တက္ကသိုလ် ပါမောက္ခ ဒေါက်တာ စရီဆူပရာတစ် ရဲ့ ပြောကြားချက်အရ အထက်ပိုင်း ဆာဒေါင်ခရိုင်မှာ ရေနည်းသွားပေမယ့် ဟတ်ယိုင်မြို့ထဲကို စီးဝင်လာမယ့် ရေပမာဏက ပိုများလာမှာဖြစ်လို့ ရေကြီးမှု ပိုဆိုးလာနိုင်တယ်လို့ ဆိုပါတယ်။ နိုဝင်ဘာ ၂၁ ကနေ ၂၅ ရက်အတွင်း ရွာခဲ့တဲ့ မိုးရေချိန် ကနေ ရေစီးဆင်းမှု ကုဗမီတာ သန်း ၁,၂၀၀ ကျော် ထွက်ပေါ်လာခဲ့ပါတယ်။ ပုံမှန်အတိုင်း ရေပြန်ကျဖို့ ရက်ပေါင်း ၁၀ ရက်လောက် ကြာဦးမှာဖြစ်ပြီး၊ ဒီလကုန်အထိ ပင်လယ်ရေမျက်နှာပြင် မြင့်နေတာကြောင့် ပိုပြီး နှောင့်နှေးစေဦးမယ်လို့ သူက ခန့်မှန်းထားပါတယ်။
ပါမောက္ခက အစိုးရရဲ့ ဘေးအန္တရာယ်စီမံခန့်ခွဲမှုကို ပြင်းပြင်းထန်ထန် ဝေဖန်ခဲ့ပါတယ်။ ရေဘေးအခြေအနေက အဆင့် ၃ အထိ ရောက်နေပြီး ဝန်ကြီးက ကွပ်ကဲနေတယ်လို့ ဆိုပေမယ့် လက်တွေ့မှာ ထိရောက်တဲ့ ဗဟိုကွပ်ကဲရေးစနစ် မရှိဘူး လို့ သူက ထောက်ပြပါတယ်။လူတွေ ခေါင်မိုးပေါ်မှာ ပိတ်မိနေပြီး ကားတွေနစ်နေသလို အားနည်းသူတွေ အကူအညီတောင်းနေပေမဲ့ ဗဟိုချုပ်ကိုင်မှုရှိတဲ့ ကွပ်ကဲရေးစနစ် မရှိဘူး လို့ သူက ဝေဖန်ခဲ့ပါတယ်။ဒါ့အပြင် အရေးပေါ်အနေနဲ့ ရေနုတ်မြောင်း မြန်စေဖို့နဲ့ ဆုံးရှုံးမှု သက်သာစေဖို့ လမ်းမြေသားတမံတွေကို ဖြတ်တောက်တာမျိုး ချက်ချင်းလုပ်ဆောင်ဖို့ အကြံပြုထားကြောင်း Bangkok post သတင်းအရ သိရပါတယ်။
ရေကြီးမှုကြောင့် လုပ်သားသုံးသိန်းကျော် သက်ရောက်မှုရှိမယ်လို့ အလုပ်သမားဝန်ကြီးဌာနက ခန့်မှန်းထားပါတယ်။ ရေကြီးမှုကြောင့် အလုပ်အကိုင်ဆုံးရှုံးရသူတွေကိုလည်း လစာရဲ့ ၅၀ ရာခိုင်နှုန်းကို ၆ လအထိ လူမှုဖူလုံရေးစနစ်ကနေ ပေးသွားမယ်လို့ အလုပ်သမားဝန်ကြီးက ပြောထားပါတယ်။
