ရေဘေးကြောင့် အလုပ်လက်မဲ့ဖြစ်သွားခဲ့လျှင် လူမှုဖူလုံရေးမှ ၆လအထိ လျော်ကြေး ပေးမည်ဟု အလုပ်သမားဝန်ကြီး ပြော 

အလုပ်သမားဝန်ကြီးဌာန ဝန်ကြီး ထရီနုချ်သီယန်ထောင်း က လက်ရှိ တောင်ပိုင်းဒေသမှာ ဖြစ်ပွားနေတဲ့ ရေကြီးရေလျှံမှုတွေနဲ့ ပတ်သက်ပြီး အလုပ်သမားတွေနဲ့ လုပ်ငန်းရှင်တွေကို ကူညီဖို့အတွက် ဝန်ကြီးဌာနရဲ့ အရေးပေါ်အစီအစဉ်တွေကို ရှင်းပြခဲ့ပါတယ်။

ဝန်ကြီးက ရေဘေးသင့်တဲ့ ပြည်နယ် ၁၄ ခုလုံးမှာရှိတဲ့ အဓိကတာဝန်ရှိသူတွေကို ၂၄ နာရီပတ်လုံး အခြေအနေကို စောင့်ကြည့်ဖို့နဲ့ ထိခိုက်ပျက်စီးမှုတွေကို အမြန်ဆုံး စာရင်းပြုစုဖို့ ညွှန်ကြားထားတယ်လို့ ဆိုပါတယ်။ 

ရေဘေးသင့်သူတွေအတွက် ဝန်ကြီးဌာနအနေနဲ့ ဌာနအလိုက် အခုလို အထူးအစီအစဉ်တွေ ချမှတ်ပြီး ဆောင်ရွက်နေတယ်လို့ သိရပါတယ်။

အလုပ်အကိုင် အစားထိုးပေးခြင်း 

ရေကျသွားလို့ လုပ်ငန်းခွင်ပြန်မဝင်နိုင်သူတွေအတွက် အလုပ်လစ်လပ်နေရာအသစ်တွေ ကို ရှာဖွေပေးမှာဖြစ်ပြီး ချက်ချင်း ဝင်ငွေမပြတ်စေဖို့ အမြန်ဆုံး အိမ်ကနေ လုပ်ကိုင်နိုင်တဲ့အလုပ် တွေ ပေးနိုင်ဖို့ စီစဉ်နေပါတယ်။

အခမဲ့ပြုပြင်ရေးနဲ့ သင်တန်းများ 

ရေနစ်မြုပ်လို့ ပျက်စီးသွားတဲ့ လျှပ်စစ်ပစ္စည်းတွေ၊ ယာဉ်တွေနဲ့ စိုက်ပျိုးရေးသုံးစက်ပစ္စည်းတွေကို အခမဲ့ ပြုပြင်ပေးမယ့် စင်တာ တွေ ချက်ချင်းဖွင့်လှစ်မှာဖြစ်ပြီး ရေဘေးပြီးနောက် ဝင်ငွေပြန်ရှာနိုင်ဖို့ အသက်မွေးဝမ်းကျောင်းဆိုင်ရာ ကျွမ်းကျင်မှု မြှင့်တင်ရေးသင်တန်းတွေ ကိုလည်း အဆင်သင့် ပြင်ဆင်ထားမှာပါ။ 

ဥပဒေရေးရာနဲ့ အခွင့်အရေး ကာကွယ်ပေးခြင်း 

ရေဘေးသင့်တဲ့ လုပ်ငန်းခွင်တွေနဲ့ အလုပ်သမားတွေရဲ့ ဆုံးရှုံးမှုတွေကို လိုက်လံစစ်ဆေးပြီး အလုပ်သမားဥပဒေအရ သူတို့ရသင့်ရထိုက်တဲ့ လျော်ကြေးနဲ့ အခွင့်အရေးတွေ ကို အပြည့်အဝရရှိအောင် ကူညီပေးနိုင်ဖို့လည်း ဆောင်ရွက်သွားမှာပါ။ လိုအပ်ရင် ဘေးကင်းရေးရန်ပုံငွေက ချေးငွေ ရယူနည်းကိုလည်း အကြံဉာဏ်ပေးမယ်လို့ ဆိုပါတယ်။

လူမှုဖူလုံရေး လျော်ကြေးနဲ့ ချေးငွေ 

သဘာဝဘေးကြောင့် အလုပ်လက်မဲ့ဖြစ်သွားတဲ့ အာမခံထားသူတွေအတွက် လျော်ကြေးငွေ ကို အမြန်ဆုံး ပေးချေသွားမှာ ဖြစ်ပြီး လျော်ကြေးအနေနဲ့ လုပ်ခရဲ့ ၅၀% ကို အများဆုံး ၆ လအထိ ရရှိမှာပါ။ အလုပ်ရှင်တွေအတွက် အတိုးနှုန်းသက်သာတဲ့ ချေးငွေ တွေလည်း စီစဉ်ပေးနေပြီး ရေဘေးကြောင့် ဒဏ်ရာရတဲ့ အာမခံထားသူတွေကို ကွန်ရက်ဆေးရုံတွေနဲ့ ချိတ်ဆက်ပြီး အပြည့်အဝကုသမှု ပေးဖို့လည်း စီစဉ်ထားတယ်လို့ သိရပါတယ်။

ဝန်ကြီးက ဘေးသင့်သူတွေအနေနဲ့ ကိုယ့်ဒေသနားက အလုပ်သမားဝန်ကြီးဌာနရုံးတွေမှာ သွားရောက် ဆက်သွယ်နိုင်သလို အရေးပေါ် ဖုန်းလိုင်းနံပါတ် ၁၅၀၆ ကိုလည်း ၂၄ နာရီလုံး ခေါ်ယူအကူအညီတောင်းနိုင်ကြောင်း ပြောကြားခဲ့ပါတယ်။