မနက်ဖြန် ဒုတိယအကြိမ် ညှိနှိုင်းမည်
ထိုင်းနိုင်ငံ၊ ချွန်ပူရီမြို့၊ Daikin ကုမ္ပဏီက ဝန်ထမ်းတွေဟာ ၂၀၂၅ ခုနှစ် နှစ်ကုန်ဘောနပ်စ် မကျေနပ်မှုနဲ့ပတ်သက်လို့ ဆက်တိုက် ဆန္ဒပြနေကြတဲ့ ပြဿနာဟာ အတော်လေးကို ပြင်းထန်နေပါတယ်။ Daikin ဝန်ထမ်းတွေဟာ ကုမ္ပဏီဘက်က ကမ်းလှမ်းတဲ့ ၅ လစာ + ဘတ် ၁၂,၀၀၀ ကို လုံးဝလက်မခံနိုင်ဘဲ ဆန္ဒပြပွဲတွေ ဆင်နွှဲနေတာ ရက်အတော်ကြာနေပါပြီ။ ဘာကြောင့်လဲဆိုတော့ သူတို့ဟာ ပြီးခဲ့တဲ့ ၂၀၂၄ မှာတုန်းက ၇ လစာ အထိ ရခဲ့ဖူးတာကြောင့်ပါ။
ဝန်ထမ်းသမဂ္ဂ ကိုယ်စားလှယ်တွေရဲ့ တောင်းဆိုမှုတွေကတော့ ပိုပြီး အရှိန်မြင့်လာပြီး မူလ ၂၁ လစာ + ဘတ် ၁ သိန်းကနေ ၁၈ လစာ + ဘတ် ၂ သိန်း အထိ တောင်းဆိုနေကြပါတယ်။ ဒီလို မြင့်မားတဲ့ တောင်းဆိုမှုတွေကြောင့် ဆိုရှယ်မီဒီယာပေါ်မှာ အမြင်တွေ ကွဲပြားနေပြီး အလွန်အကျွံ တောင်းဆိုမှုတွေက ဂျပန်ကုမ္ပဏီကို ထိုင်းကနေ ထုတ်လုပ်ရေး အခြေစိုက်စခန်း ရွှေ့ပြောင်းသွားအောင် တွန်းအားပေးနိုင်တယ် လို့ ဝေဖန်မှုတွေလည်း ရှိနေပါတယ်။
ဒီကနေ့မှာတော့ ချွန်ပူရီပြည်နယ် အလုပ်သမားရေးရာ ကာကွယ်စောင့်ရှောက်ရေး အရာရှိ မစ္စတာ ချေစ်ဆတ် အုန်ခမ်း က ဒီပြဿနာကို ပြည်နယ်အုပ်ချုပ်ရေးမှူးက သိရှိပြီးဖြစ်ကြောင်းနဲ့ ဘက်အားလုံးအတွက် တရားမျှတတဲ့ အဖြေတစ်ခုရဖို့ ဝင်ရောက် ဖြေရှင်းပေးနေကြောင်း ပြောကြားခဲ့ပါတယ်။ အရေးကြီးတဲ့ အစည်းအဝေးတစ်ခုကိုတော့ မနက်ဖြန် နိုဝင်ဘာ ၂၆ရက်၊ နေ့လယ် ၂:၀၀ နာရီမှာ ကျင်းပသွားမယ်လို့ သိရပါတယ်။
ဒါဟာ ပထမအကြိမ် ညှိနှိုင်းမှု မအောင်မြင်လို့ ဆန္ဒပြမှုတွေ ဆက်ဖြစ်နေတဲ့နောက်ပိုင်း ဒုတိယအကြိမ်မြောက် တွေ့ဆုံ ဆွေးနွေးမှု ဖြစ်ပါတယ်။ ဂျပန်အုပ်ချုပ်ရေးအဖွဲ့မှာ စိုးရိမ်ပူပန်စရာတွေ ရှိနေပေမယ့် ဒီပြဿနာကို ညှိနှိုင်းပြီး အပြီးသတ်ဖြေရှင်းချက်တစ်ခု ရရှိရမယ်လို့ အုပ်ချုပ်ရေးမှူးက ပြောကြားခဲ့ကြောင်း MGR သတင်းအရ သိရပါတယ်။
