ကားလက်မှတ်ဖိုး ပြန်ထုတ်ယူနိုင်
တောင်ပိုင်းဒေသမှာ ရေကြီးမှု အခြေအနေက ဆိုးရွားလာတာကြောင့် သယ်ယူပို့ဆောင်ရေးကုမ္ပဏီ (Bor Kor Sor ) တွေက သူတို့ရဲ့ ဘတ်စ်ကားလမ်းကြောင်း ၆ခုကို ခေတ္တရပ်နားလိုက်ပြီလို့ သိရပါတယ်။
ဒီနေ့မှာပဲ ဆုန်ခလာ၊ ပတ္တနီ၊ ယာလာ၊ နရာသီဝပ်၊ စတုန်းစတဲ့ ပြည်နယ်တွေမှာ မိုးတွေ ဆက်တိုက်သည်းထန်နေပြီး ရေတွေ မြင့်တက်လာလို့ လမ်းတွေ ပိတ်ဆို့နေတယ်လို့ ဆိုပါတယ်။
ဒါကြောင့် နိုင်ငံပိုင် ဘတ်စ်ကားကုမ္ပဏီက ခရီးသည်တွေရဲ့ ဘေးကင်းရေးကို ဦးစားပေးပြီး အခြေအနေ ပြန်ကောင်းလာတဲ့အထိ တောင်ပိုင်းခရီးစဉ်တွေကို မဖြစ်မနေ ရပ်နားရတာပါလို့ ထုတ်ပြန်ခဲ့ပါတယ်။ လက်ရှိ ရပ်ဆိုင်းလိုက်တဲ့ ခရီးစဉ်တွေကတော့
- Bus No.984: ဘန်ကောက်-ထရန်း-စတုန်း
- Bus No.987: ဘန်ကောက်-ယာလာ
- Bus No.988: ဘန်ကောက်-စတုန်း
- Bus No.992: ဘန်ကောက်-ဟတ်ယိုင်
- Bus No.9917: ဘန်ကောက်-ပတ္တနီ
- Bus No.9917: ဘန်ကောက်-ဆွန်ငိုင် ကိုလော့ခ်
လက်မှတ်ဝယ်ပြီးသား ခရီးသည်တွေအနေနဲ့ လက်မှတ်ဖိုး ပြန်အမ်းငွေ (Refund) လိုချင်တယ်ဆိုရင် နိုင်ငံတစ်ဝန်းမှာရှိတဲ့ Bor Kor Sor ရဲ့ လက်မှတ်ကောင်တာတွေမှာ သွားရောက် ဆက်သွယ်နိုင်တယ်လို့ ကုမ္ပဏီက အသိပေးထားပါတယ်။
သတင်း – Bangkok post