အစိုးရအရာရှိတွေနဲ့ ပွဲစားများ ပါဝင်နေ
ထိုင်းအစိုးရရဲ့ အေဂျင်စီကြီး ၅ ခု ပူးပေါင်းပြီး နိုင်ငံခြားသားတွေကို တရားမဝင် နိုင်ငံသားဖြစ်ခွင့် မှတ်ပုံတင် လိမ်လည်ထုတ်ပေးနေတဲ့ ကွန်ရက် တစ်ခုကိုဖော်ထုတ် ဖမ်းဆီးခဲ့တယ်လို့ သိရပါတယ်။ လွန်ခဲ့တဲ့ အင်္ဂါနေ့က စီးနင်းခဲ့တာဖြစ်ပြီး ဒီကွန်ရက်ဟာ မီးခိုးရောင်တရုတ်ဂိုဏ်း လို့ နာမည်ကြီးတဲ့ နိုင်ငံဖြတ်ကျော်မှုခင်းအဖွဲ့တွေနဲ့ ချိတ်ဆက်ထားတဲ့ တာဝန်ရှိသူတွေ၊ ပွဲစားတွေနဲ့ နိုင်ငံခြားသား ၂၈ ဦး ပါဝင်တယ်လို့ အာဏာပိုင်တွေက ဖော်ထုတ်ခဲ့ပါတယ်။
DOPA၊ CIB၊ NACC၊ PACC နဲ့ DSI အပါအဝင် အဓိကအေဂျင်စီကြီးတွေဟာ သံသယရှိသူအားလုံးကို ဖမ်းဝရမ်းထုတ်ပြီး နေရာအနှံ့ တစ်ပြိုင်နက် ဝင်ရောက်ရှာဖွေခဲ့ကြပါတယ်။လက်ရှိအချိန်ထိ သံသယရှိသူ ၁၂ ဦး ကို ဖမ်းမိထားပြီး ချင်းမိုင်၊ ဖယောင်း၊ ဘန်ကောက်၊ စမွတ်စခွန်းတို့လို နေရာပေါင်းစုံကနေ ဖမ်းဆီးခဲ့တာပါ။
လက်နက်တွေ၊ ကျည်ဆန်တွေ၊ ဘဏ်စာရင်းတွေ၊ လိမ်လည်ထားတဲ့ လျှောက်လွှာပုံစံတွေနဲ့ နိုင်ငံသား စာရွက်စာတမ်းအတုတွေ အမြောက်အမြား သိမ်းဆည်းရမိခဲ့တယ်လို့ သိရပါတယ်။
သံသယရှိသူတွေဟာ တာဝန်မဲ့မှု၊ အဂတိလိုက်စားမှုနဲ့ ပူးပေါင်းကြံစည်မှု တို့နဲ့ ရင်ဆိုင်ရမှာဖြစ်ပြီး တရုတ်နိုင်ငံသား ၃ ဦးကတော့ နိုင်ငံပြင်ပကို ထွက်ပြေးသွားပြီလို့ သိရပါတယ်။
ဒီကိစ္စမှာ ပါဝင်တဲ့ ဝီယန်ဟိုင် ခရိုင်အုပ်ချုပ်ရေးမှူး ဟာလည်း အဖမ်းခံခဲ့ပြီး ပွဲစားတွေကတော့ လွတ်မြောက်နေဆဲ ဖြစ်ပါတယ်။ ဒီလို လုပ်ရပ်တွေဟာ အရင်ကလည်း ဖြစ်ဖူးတဲ့ ထိုင်း ID ကတ်အတု လိမ်လည်မှုတွေ၊ Online လောင်းကစားတွေနဲ့ Call-center လိမ်လည်မှုတွေလို နိုင်ငံဖြတ်ကျော် ရာဇဝတ်ဂိုဏ်းတွေနဲ့ ဆက်စပ်နေတယ်လို့ စုံစမ်းစစ်ဆေးသူတွေက ယုံကြည်ထားပါတယ်။
ဝန်ကြီးချုပ် အနုတင်ချန်ဝီရာကူ ကတော့ ဒီကိစ္စကို ပြင်းပြင်းထန်ထန် ရှုတ်ချလိုက်ပြီး နိုင်ငံမဲ့ဘဝနဲ့ နှစ် ၄၀ ကျော် နေထိုင်လာရတဲ့သူတွေကို အမြတ်ထုတ်တာဟာ တိုင်းပြည်လုံခြုံရေးနဲ့ တရားဥပဒေစိုးမိုးရေးကို ထိခိုက်စေတဲ့ လုပ်ရပ်ပဲ လို့ ပြောပါတယ်။ DOPA ကတော့ လိမ်လည်ထားတဲ့ မှတ်ပုံတင်တွေအားလုံးကို ပယ်ဖျက်သွားမှာဖြစ်ပြီး နိုင်ငံခြားသား မှတ်တမ်းတွေကို တစ်နိုင်ငံလုံးအတိုင်းအတာနဲ့ စစ်ဆေးသွားမယ်လို့ ကြေညာပါတယ်။ လိမ်လည်ပြီး ရယူထားတဲ့ နိုင်ငံသားဖြစ်ခွင့်ကိုလည်း ချက်ချင်းပယ်ဖျက်ပြီး ငွေကြေးလမ်းကြောင်းတွေကို Amlo ကို ပို့ပြီး ဆက်လက် စစ်ဆေးသွားမှာ ဖြစ်တယ်လို့ Bangkok post သတင်းမှာ ဖော်ပြပါတယ်။
