ခေါင်းဆောင်က မူးယစ်မှုနှင့် ထောင်ကျထားသူဖြစ်
စူရတ်ဌာနီခရိုင်၊ ကော့ဖငန်ကျွန်းမှာ မူးယစ်ဆေးဝါး ရောင်းချသူနဲ့ သုံးစွဲသူ မြန်မာနိုင်ငံသား ၆ ဦးပါ အဖွဲ့တစ်ခုကို ခရီးသွားရဲတပ်ဖွဲ့က ဖမ်းဆီးလိုက်တယ်လို့ သိရပါတယ်။ သိမ်းဆည်းရမိတဲ့ ပစ္စည်းတွေထဲမှာ WY ဆေးပြားနဲ့ ICE မူးယစ်ဆေးတွေ ပါဝင်ပါတယ်။
နိုဝင်ဘာလ ၂၁ ရက်နေ့မှာ ခရီးသွားရဲတပ်ဖွဲ့ စုံစမ်းရေးအဖွဲ့ဟာ လူဝင်မှုကြီးကြပ်ရေးအဖွဲ့နဲ့ ပူးပေါင်းပြီး မြန်မာနိုင်ငံသား ၆ ဦးကို ဖမ်းဆီးခဲ့တာပါ။ သူတို့ကို မူးယစ်ဆေးဝါး ရောင်းဝယ်မှု၊ သုံးစွဲမှုနဲ့ တရားမဝင် နေထိုင်မှုတွေနဲ့ စွဲချက်တင်ထားတယ်လို့ သိရပါတယ်။ အသက် ၂၇ နှစ်အရွယ် မြန်မာလူငယ်ကို WY မူးယစ်ဆေး ၂ ပြားနဲ့ စတင်ဖမ်းမိရာကနေ သူက အသက် ၂၃ နှစ်အရွယ် စည်သူဆိုတဲ့ သူထံက ဝယ်ယူခဲ့ကြောင်း ထွက်ဆိုခဲ့တာပါ။ ဒါကြောင့် ရဲတွေက စည်သူ ဆိုသူကို ဖမ်းဖို့ စတိုးဆိုင်ရှေ့မှာ အကွက်ချခဲ့ပေမဲ့ ထွက်ပြေး လွတ်မြောက်သွားခဲ့တယ်လို့ ဆိုပါတယ်။
အဲဒီနောက် ရဲတပ်ဖွဲ့ဟာ မြို့နယ်အကြီးအကဲနဲ့ ပူးပေါင်းပြီး CCTV မှတ်တမ်းတွေ စစ်ဆေးရာကနေ စည်သူ ငှားရမ်းထားတဲ့ အိမ်ကို ရှာဖွေတွေ့ရှိခဲ့တာကြောင့် သွားရောက် စစ်ဆေးရာမှ မူးယစ်ဆေးဝါး ပို့ဆောင်ရာမှာ သုံးတဲ့ ဆိုင်ကယ်ကို အပြင်မှာ တွေ့ရတယ်လို့ ဆိုပါတယ်။ အိမ်ထဲဝင်ရောက်စစ်ဆေးရာမှာတော့ အဖွဲ့ခေါင်းဆောင် စည်သူက အခန်းရှေ့မှာ အိပ်ပျော်နေတာကို တွေ့ရှိရပြီး နောက်ထပ် မြန်မာလူငယ် ၃ ဦးဟာလည်း အခန်းတွင်းမှာ မူးယစ်ဆေး သုံးစွဲနေကြသလို WY ဆေးပြားတွေကို အိတ်တွေထဲ ထည့်ပိုးနေကြတာကို တွေ့ရှိခဲ့တယ်လို့ သိရပါတယ်။
ရှာဖွေမှုတွေအရ WY ဆေးပြား စုစုပေါင်း ၁၁၆ ပြား နဲ့ ICE မူးယစ်ဆေးဝါး ၀.၂၂ ဂရမ် ကို သိမ်းဆည်းရမိခဲ့ပြီး ဖမ်းမိသူတွေဟာ အဆိုပါ မူးယစ်ဆေးတွေကို ကော့စမွေက မြန်မာအမျိုးသားတစ်ဦးဆီကနေ တစ်ထုပ် (ပြား ၁၀၀) ကို ဘတ် ၃,၀၀၀ နဲ့ ဝယ်ယူပြီး ကော့ဖန်မှာ တစ်ပြားကို ဘတ် ၁၀၀ နဲ့ ပြန်ရောင်းချတယ်လို့ ဝန်ခံခဲ့ကြပါတယ်။ အဖွဲ့ ခေါင်းဆောင်ဖြစ်တဲ့ စည်သူက မူးယစ်ဆေးဝါးအမှုနဲ့ ၂၀၂၃ ခုနှစ်မှာ ဒီရဲတပ်ဖွဲ့ရဲ့ ဖမ်းဆီးခြင်းကို ခံခဲ့ရဖူးပြီး ထောင်က လွတ်မြောက်လာတာ ၂ လပဲ ရှိသေးတယ်လို့ သိရပါတယ်။ ဆက်လက်စစ်ဆေးမှုအရ မြန်မာနိုင်ငံသား ၂ ဦးကိုလည်း ထပ်မံ ဖမ်းဆီးခဲ့ပြီး သူတို့နှစ်ဦးစလုံးက WY ဆေးသုံးထားကြောင်း ဝန်ခံခဲ့ပါတယ်။ ရဲတပ်ဖွဲ့ဟာ ဖမ်းဆီးရမိသူ ၆ ဦးကို စွဲချက်တင်ပြီး ဥပဒေအရ အရေးယူနိုင်ဖို့ ကော့ဖန်ရဲစခန်းကို လွှဲပြောင်းပေးခဲ့ကြောင်း MGR သတင်းအရ သိရပါတယ်။
