ထိုင်းနိုင်ငံ၊ စူရတ်ဌာနီခရိုင်၊ ကော့ဖန်ငန်ကျွန်းမှာ ဘတ်သန်း ၁၀၀ ကျော်တန်ဖိုးရှိတဲ့ ဇိမ်ခံဗီလာဆောက်လုပ်ရေး လုပ်ငန်းတွေ တရားမဝင်လုပ်ကိုင်နေတဲ့ နိုင်ငံခြားသားပိုင် စီမံကိန်းတစ်ခုကို အာဏာပိုင်တွေ ဝင်ရောက်စစ်ဆေး ခဲ့ရာမှ မြန်မာအလုပ်သမားတစ်ဦး ဖမ်းဆီးခံခဲ့ရတယ်လို့ သိရပါတယ်။
နိုဝင်ဘာလ ၂၁ ရက်နေ့မှာ စူရတ်ဌာနီခရိုင်ရဲ့ နိုင်ငံခြားသား တရားမဝင်လုပ်ငန်း နှိမ်နင်းရေးအဖွဲ့ဟာ ကော့ဖန်ငန်ကျွန်း၊ အမှတ် ၈ ကျေးရွာက ပင်လယ်ကမ်းစပ်နားမှာရှိတဲ့ ဗီလာဆောက်လုပ်ရေး လုပ်ငန်းခွင်တစ်ခုကို ဝင်ရောက်စစ်ဆေးခဲ့တာပါ။ ဒီနေရာဟာ ဧရိယာ ၄ ရိုင် (၁.၆ ဧက) စာလောက်ကျယ်ပြီး နာမည်ကြီး ကော့မာ ရေငုပ်ကမ်းခြေနဲ့ နီးပါတယ်။ စစ်ဆေးတဲ့အခါ ဗီလာအလုံး ၂၀ ကျော်ကို ဆောက်လုပ်နေတာ တွေ့ရပြီး ပြီးစီးပြီးသား ဗီလာ ၅ လုံးလည်း တွေ့ရတယ်လို့ ဆိုပါတယ်။ ဖမ်းဆီးမှုအတွင်း ဆောက်လုပ်ရေးလုပ်ငန်းခွင်ထဲက မြန်မာနိုင်ငံသား အလုပ်သမားတစ်ဦးကိုလည်း တရားမဝင်နေထိုင်မှုနဲ့ ဖမ်းဆီးခဲ့တယ်လို့ သိရပါတယ်။
ရဲမှူးကြီး ဆွမ်ဘတ်ချမ်ဆမ် ဦးဆောင်တဲ့ အဖွဲ့ရဲ့ စစ်ဆေးချက်အရ ဒီစီမံကိန်းပိုင်ရှင်တွေဟာ နိုင်ငံခြားသားတွေဖြစ်ပြီး တရားမဝင် လုပ်ငန်းလုပ်ကိုင်ဖို့ ထိုင်းလူမျိုးတွေကို အမည်ခံ (Nominee) အဖြစ် ရှယ်ယာဝင်ခိုင်းထားတာပါ။ ဒီစီမံကိန်းကို ပိုင်ဆိုင်တဲ့ ကုမ္ပဏီ ၂ ခုရဲ့ ဒါရိုက်တာဟာ ယူကရိန်းနိုင်ငံသားဖြစ်ပြီး စုစုပေါင်း မှတ်ပုံတင်ထားတဲ့ ရင်းနှီးငွေဟာ ဘတ် သန်း ၁၀၀ ကျော်ရှိတယ်လို့ သိရပါတယ်။ စီမံကိန်းထဲမှာ တစ်လုံးကို ဘတ် ၅၉ သန်းနဲ့ ရောင်းချမယ့် ဇိမ်ခံဗီလာတွေ ပါဝင်ပါတယ်။
စုံစမ်းတွေ့ရှိချက်အရ နိုင်ငံခြားသား ပိုင်ရှင်ဟာ ကိုယ်ပိုင် ဆောက်လုပ်ရေးကန်ထရိုက်တာကုမ္ပဏီ တည်ထောင်ပြီး မြန်မာနိုင်ငံသား အလုပ်သမား အများစုကို ခန့်အပ်အသုံးပြုနေတာ တွေ့ရတယ်လို့ ဆိုပါတယ်။ အာဏာပိုင်တွေက နော်မီနီအသုံးပြုပြီး တရားမဝင်စီးပွားရေး လုပ်ကိုင်နေတဲ့ နိုင်ငံခြားသားတွေနဲ့ပတ်သက်ပြီး မြေပိုင်ဆိုင်မှု၊ အခွန်ဆောင်မှု၊ ငွေကြေးစီးဆင်းမှု လမ်းကြောင်းအားလုံးကို စစ်ဆေးပြီး အမှုဖွင့် အရေးယူသွားမယ်လို့ ပြောကြားထားပါတယ်။
သတင်း – daily news
