တာ့ခ်ခရိုင်၊ မယ်ရမာ့ဒ်မြို့နယ်မှာ နိုဝင်ဘာလ ၁၉ ရက်၊ မနက်အစောပိုင်း အချိန်က တရားမဝင် ဝင်ရောက်လာတဲ့ မြန်မာနိုင်ငံသား အမျိုးသား ၂၀ဦး၊ အမျိုးသမီး ၁၆ဦး စုစုပေါင်း ၃၆ ဦးကို ထိုင်းလုံခြုံရေးအဖွဲ့တွေ ဖမ်းဆီးလိုက်ပါတယ်။
လက်ရှိမှာ မြန်မာဘက်ခြမ်းက ရွှေကုက္ကိုလ်လို နေရာတွေမှာ အွန်လိုင်းလိမ်လည်မှု အဖွဲ့တွေကို နှိမ်နင်းနေချိန်မို့ အဲဒီအခွင့်အရေးကို အသုံးချပြီး တခြားသူတွေပါ ထိုင်းထဲ တရားမဝင် ဝင်ရောက်လာနိုင်တယ်ဆိုပြီး ထိုင်းအာဏာပိုင်တွေက နယ်စပ်ကို တင်းတင်းကျပ်ကျပ် စောင့်ကြည့်နေတာပါ။ နယ်ခြားစောင့်ရဲ၊ ရေတပ်သားနဲ့ ဒေသခံ လုံခြုံရေးအဖွဲ့တွေ ပူးပေါင်းပြီး နယ်စပ်တစ်လျှောက် လှည့်ကင်းစဉ်မှာ မယ်ရမာ့ဒ်မြို့နယ်ထဲက လယ်ကွင်းပြင်တစ်ခုမှာ လူအုပ်စုတစ်ခုကို သတိထားမိလို့ စစ်ဆေးခဲ့ကြတယ်လို့ ဆိုပါတယ်။
စစ်ဆေးမှုအတွင်း တွေ့ရှိရသူ ၃၆ ဦးဟာ ဝင်ရောက်ခွင့် စာရွက်စာတမ်းမရှိဘဲ တရားမဝင် ဝင်ရောက်လာတဲ့ မြန်မာနိုင်ငံသားတွေ ဖြစ်တယ်လို့ သိရပါတယ်။ ဖမ်းမိသူတွေက သူတို့ဟာ မြန်မာဘက်ကနေ လှေနဲ့ကူးပြီး ခြေလျင်လမ်းကြောင်းတွေ၊ ယာဉ်တွေနဲ့ ခရီးဆက်လာခဲ့တာလို့ ဝန်ခံခဲ့ပါတယ်။ သူတို့ရဲ့ ရည်ရွယ်ချက်ကတော့ ထိုင်းနိုင်ငံထဲမှာ အလုပ်လုပ်ကိုင်ဖို့ ဖြစ်ပြီး အထူးသဖြင့် စမွတ်စာခွန် နဲ့ ဘန်ကောက်ကို သွားချင်တာဖြစ်တယ်လို့ ပြောပါတယ်။
လက်ရှိမှာတော့ မြန်မာလုပ်သား ၃၆ ဦးလုံးကို တရားမဝင် နယ်စပ်ဖြတ်ကျော်သူတွေအဖြစ် စွဲချက်တင်ပြီး ဥပဒေအရ အရေးယူနိုင်ဖို့ မယ်ရမာ့ဒ် ရဲစခန်းကို လွှဲပြောင်းပေးလိုက်ပြီ ဖြစ်တယ်လို့ ch7 သတင်းအရ သိရပါတယ်။
