ဖူးခက်မြို့ကို ဝင်တဲ့ အဓိကဂိတ်ဖြစ်တဲ့ ထာ့ချပ်ချိုင် စစ်ဆေးရေးဂိတ်မှာ နိုဝင်ဘာလ ၁၈ ရက်နေ့ မနက်ပိုင်းက အထောက်ထားမပြည့်စုံသည့် ရွှေ့ပြောင်းလုပ်သား ၂၀ ဦးကို တင်ဆောင်လာတဲ့ ပစ်ကပ်ကားနှစ်စီးကို ရဲတွေက ဖမ်းဆီးလိုက်တယ်လို့ သိရပါတယ်။ ဖမ်းမိတဲ့သူတွေထဲမှာ မြန်မာစုစုပေါင်း ၂၀ ဦး ပါဝင်ပြီး ယာဉ်မောင်း ၂ ဦးလည်း ဖမ်းဆီးခံရပါတယ်။
စစ်ဆေးချက်အရ ဒီအဖွဲ့ကို ချွန်ဘူရီခရိုင်၊ ပတ္တရားက ဆောက်လုပ်ရေးလုပ်ငန်းခွင်တစ်ခုကနေ ခေါ်လာပြီး ဖူးခက်၊ ထလန်ခရိုင်က ဆောက်လုပ်ရေးလုပ်ငန်းခွင်တစ်ခုကို ပို့ဆောင်ပေးဖို့ စီစဉ်ထားတာဖြစ်ကြောင်း သိရပါတယ်။ သူတို့အားလုံးကို ဘန်ကောက်လိုင်စင်နဲ့ အဖြူရောင် Toyota Revo ပစ်ကပ်ကားတွေရဲ့ နောက်ခန်းတွေမှာ ဖွက်ပြီး သယ်လာတာဖြစ်ပါတယ်။ ဖမ်းဆီးရမိတဲ့ ယာဉ်မောင်းနှစ်ဦးကတော့ ချင်းရိုင်မြို့နယ်နဲ့ မယ်ဖာလောင်မြို့နယ်က အသက် ၂၈ နှစ်နဲ့ ၂၇ နှစ်အရွယ် ထိုင်းအမျိုးသားတွေ ဖြစ်တယ်လို့ သိရပါတယ်။
လက်ရှိမှာတော့ ယာဉ်မောင်းနှစ်ဦးကို တရားစွဲထားပြီး ဖမ်းဆီးရမိတဲ့ ရွှေ့ပြောင်းလုပ်သားတွေကိုတော့ သက်ဆိုင်ရာဌာနပေါင်းစုံကနေ လူကုန်ကူးမှုဆိုင်ရာ လုပ်ထုံးလုပ်နည်းတွေအတိုင်း စိစစ် စစ်ဆေးမှုတွေ ဆက်လက်လုပ်ဆောင်နေတယ်လို့ ထာ့ချပ်ချိုင်ရဲစခန်းက အတည်ပြု ပြောကြားကြောင်း Phuket သတင်းအရ သိရပါတယ်။
