ပွဲစားခ ဘတ် ၄ သောင်းထိ ပေးခဲ့ရ
ထိုင်းနိုင်ငံ၊ ချန်ထပူရီ နယ်စပ်မှာ ကမ္ဘောဒီးယားသို့ တရားမဝင် ဖြတ်ကျော်ဖို့ ကြိုးစားတဲ့ ရွှေ့ပြောင်းလုပ်သား ၆ ဦးကို ရဲတပ်ဖွဲ့ က ဖမ်းဆီးလိုက်တယ်လို့ သိရပါတယ်။ ဖမ်းဆီးခံရသူတွေထဲမှာ မြန်မာနိုင်ငံသား ၄ ဦးနဲ့ ကမ္ဘောဒီးယားနိုင်ငံသား ၂ ဦး ပါဝင်ပါတယ်။ သူတို့ဟာ လမ်းပြသူတစ်ဦးနဲ့အတူ ကားတစ်စီးနဲ့ လာရောက်ခဲ့တာဖြစ်ပြီး ယာဉ်မောင်းကတော့ ထွက်ပြေးလွတ်မြောက်သွားခဲ့တယ်လို့ သိရပါတယ်။
ဖမ်းဆီးရမိသူတွေရဲ့ ထွက်ဆိုချက်အရ ကမ္ဘောဒီးယားကို သွားရောက်အလုပ်လုပ်ကိုင်ဖို့အတွက် လူပွဲစားခအနေနဲ့ တစ်ဦးလျှင် ထိုင်းဘတ် ၄၀,၀၀၀ အထိ ပေးခဲ့ရတယ်လို့ သိရပါတယ်။ မြန်မာနိုင်ငံသား ၄ ဦးဟာ ကမ္ဘောဒီးယားမှာ ဆံသဆရာ၊ လုံခြုံရေးနဲ့ အလှပြင်အလုပ်တွေ လုပ်ဖို့ ရည်ရွယ်ခဲ့တာဖြစ်ပြီး ထိုင်းနိုင်ငံထဲကို သင်္ဘောလမ်းကြောင်းနဲ့ သဘာဝ နယ်စပ်ဖြတ်ကျော်လမ်းတွေကနေ ဝင်ရောက်လာခဲ့သူတွေဖြစ်တယ်လို့ ဆိုပါတယ်။
ဒါ့အပြင် ကမ္ဘောဒီးယားနိုင်ငံသား ၂ ဦးကတော့ ချန်ထပူရီမှာရှိတဲ့ တောကြက်မောက်သီးစိုက်ခင်းမှာ ၃ လခန့် အလုပ်လုပ်ခဲ့ပြီး အလုပ်ရာသီပြီးဆုံးလို့ မူရင်းနိုင်ငံကို ပြန်ဖို့ ကြိုးစားရာမှာ ဖမ်းမိတာလို့ ထွက်ဆိုခဲ့ပါတယ်။ နယ်ခြားစောင့်တပ်ဖွဲ့က ဖမ်းဆီးရမိသူအားလုံးကို လူသားချင်းစာနာထောက်ထားမှုနဲ့ စောင့်ရှောက်ပြီးနောက် ဥပဒေအရ အရေးယူနိုင်ဖို့အတွက် သက်ဆိုင်ရာ ရဲစခန်းကို လွှဲပြောင်းပေးလိုက်ပြီဖြစ်ကြောင်း သတင်းထုတ်ပြန်ထားပါတယ်။
သတင်း – MGR
