ထိုင်းနိုင်ငံ၊ ချင်းမိုင်ခရိုင်၊ မဲကျမ်မြို့နယ်မှာ အသက် ၂၇ နှစ်အရွယ် မြန်မာနိုင်ငံသား ဘွန့်ထောင်း (Bounthong) က ၎င်းရဲ့ယောက္ခမဖြစ်သူကို သေနတ်နဲ့ ပစ်သတ်ခဲ့တယ်လို့ဆိုကာ စက်တင်ဘာ ၂၀ ရက်နေ့က ဖမ်းဆီးခံခဲ့ရတယ်လို့ သိရပါတယ်။
ဖြစ်စဉ်မှာ စက်တင်ဘာ ၁၈ ရက် ညနေပိုင်းက စတင်ခဲ့တာ ဖြစ်ပါတယ်။ ဘွန့်ထောင်းဟာ ၎င်းရဲ့ဇနီးနဲ့ အိမ်တွင်းရေးပြဿနာကြောင့် စကားများရန်ဖြစ်ခဲ့ပြီး အသက် ၆၅ နှစ်အရွယ် ယောက္ခမဖြစ်သူ တာ (Ta) က ကြားဝင်ဖြေရှင်းပေးဖို့ ကြိုးပမ်းခဲ့ရာကနေ အခြေအနေပိုမိုတင်းမာလာခဲ့ပါတယ်။ အဲဒီနောက် ဘွန့်ထောင်းက ယောက္ခမဖြစ်သူကို သေနတ်နဲ့ ပစ်ခတ်ခဲ့ပြီး တောထဲကို ထွက်ပြေးတိမ်းရှောင်သွားခဲ့ပါတယ်လို့ သိရပါတယ်။
ပြစ်မှုကျူးလွန်ပြီးနောက် ထွက်ပြေးတိမ်းရှောင်နေတဲ့ ဘွန့်ထောင်းကို ရဲတပ်ဖွဲ့နဲ့ ဒေသအုပ်ချုပ်ရေးအဖွဲ့တွေ ပူးပေါင်းပြီး မဲကျမ်မြို့နယ်က တောင်တန်းဒေသမှာ နှစ်ရက်ကြာ လိုက်လံရှာဖွေခဲ့ပြီး နောက်ဆုံးမှာတော့ ဖမ်းဆီးရမိခဲ့တာ ဖြစ်ပါတယ်။ ဖမ်းဆီးရမိပြီးနောက် ဘွန့်ထောင်းကို ရဲတပ်ဖွဲ့က ပြစ်မှုကျူးလွန်ခဲ့တဲ့နေရာမှာ ပြန်လည်သရုပ်ပြခိုင်းခဲ့တယ်လို့ သိရပါတယ်။ လက်ရှိမှာတော့ ၎င်းကို စွဲချက်တင်ထားပြီး ဥပဒေနဲ့အညီ တရားရင်ဆိုင်ရတော့မယ်လို့ သတင်းတွေက ဖော်ပြပါတယ်။
ထိုင်းနိုင်ငံမှာ မြန်မာနိုင်ငံသားတွေနဲ့ ပတ်သက်ပြီး အများဆုံး ကြားသိရတဲ့ သတင်းတွေက တရားမဝင် ဝင်ရောက်မှု ဒါမှမဟုတ် အလုပ်သမားရေးရာကိစ္စတွေ ဖြစ်ပါတယ်။ ဒါပေမဲ့ ဒီလို အိမ်တွင်းရေးပြဿနာကနေ လူသတ်မှုအထိ ဖြစ်ပွားတာမျိုးကတော့ အတော်လေးကို ရှားပါတယ်လို့ သတင်းတွေက ဆိုပါတယ်။ ဒီအမှုကတော့ မြန်မာနိုင်ငံသားတွေဟာ ထိုင်းဥပဒေစိုးမိုးရေးနဲ့ ဘယ်လိုအခြေအနေမျိုးတွေမှာ ရင်ဆိုင်ကြုံတွေ့ရနိုင်လဲဆိုတာကို ထင်ဟပ်ပြနေတယ်လို့လည်း Thaiger သတင်းမှာ ဖော်ပြထားပါတယ်။
