ထိုင်းနိုင်ငံရှိ ဟိုတယ်လုပ်ငန်းရှင်တွေက အစိုးရရဲ့ လုပ်ခလစာအသစ်ဖြစ်တဲ့ တစ်နိုင်ငံလုံး အတိုင်းအတာနဲ့ တစ်ရက် ဘတ် ၄၀၀ နှုန်းထားကို ပြင်းပြင်းထန်ထန် ကန့်ကွက်နေကြပါတယ်။ ဇူလိုင်လ ၁ ရက်နေ့က စပြီး အသက်ဝင်တဲ့ ဒီစည်းမျဉ်းအသစ်က အထူးသဖြင့် ခရီးသွားနည်းပါးတဲ့ နယ်မြို့တွေမှာရှိတဲ့ ဟိုတယ်တွေအတွက် ကြီးမားတဲ့ ဝန်ထုပ်ဝန်ပိုး ဖြစ်စေနိုင်ကြောင်း ထိုင်းဟိုတယ်အသင်း (THA) က ပြောကြားလိုက်ပါတယ်။
ဘာကြောင့် ကန့်ကွက်တာလဲ
လုပ်ငန်းရှင်တွေကန့်ကွက်ရတဲ့ အဓိကအချက်ကအစိုးရရဲ့ ဆုံးဖြတ်ချက်ဟာ တစ်နိုင်ငံလုံးအတွက် တစ်ပုံစံတည်း ဖြစ်နေတာကြောင့်ဖြစ်ပါတယ်။ ဘန်ကောက်လို ခရီးသွားများပြားတဲ့ မြို့ကြီးတွေနဲ့ စီးပွါးရေးအခက်အခဲ ရှိနေတဲ့ နယ်မြို့တွေအတွက် လူနေမှုစရိတ်နဲ့ ဝင်ငွေ အခြေအနေက မတူညီတာကြောင့် ဒီဆုံးဖြတ်ချက်က မမျှတဘူးလို့ ယူဆကြတာကြောင့်ပါ။ အခန်း၅၀ နဲ့အထက် သို့မဟုတ် ကြယ်နှစ်ပွင့်နဲ့အထက် ဟိုတယ်တွေက အထိခိုက်ဆုံး ဖြစ်တယ်လို့ ဆိုပါတယ်။
ဘာအကျိုးဆက်တွေ ရှိလာနိုင်လဲ
လုပ်ခလစာတိုးမြှင့်မှုကြောင့် ဟိုတယ်တွေရဲ့ လုပ်ငန်းလည်ပတ်မှုကုန်ကျစရိတ်ဟာ သိသိသာသာ မြင့်တက်လာမှာ ဖြစ်ပါတယ်။ ကုန်ကျစရိတ်ကို လျှော့ချဖို့အတွက် ဟိုတယ်တွေက ဝန်ထမ်းအင်အားကို လျှော့ချတာ ဒါမှမဟုတ် အလုပ်အကိုင်အသစ်ခန့်အပ်တာကို ရပ်ဆိုင်းတာတွေ ပြုလုပ်နိုင်တယ်လို့ လုပ်ငန်းရှင်တွေက စိုးရိမ်နေကြတာပါ။ ဟိုတယ်ကဏ္ဍတစ်ခုတည်းကိုသာ ပစ်မှတ်ထားသတ်မှတ်လိုက်တာက စက်ရုံနဲ့ လက်လီလုပ်ငန်းတွေလို အခြားကဏ္ဍတွေနဲ့ လုပ်ခလစာ ကွာဟမှုတွေ ဖြစ်ပေါ်စေနိုင်တယ်လို့လည်း ဆိုပါတယ်။
ထိုင်းဟိုတယ်အသင်း (THA) က ဒီကိစ္စကို ဖြေရှင်းဖို့အတွက် လုပ်ခလစာတိုးမြှင့်တာကို ယာယီဆိုင်းငံ့ထားဖို့နဲ့ ဒေသအလိုက် အခြေအနေတွေကို ပိုမိုထည့်သွင်းစဉ်းစားဖို့ အစိုးရကို တောင်းဆိုထားတယ်လို့ သိရပါတယ်။ တကယ်လို့ ဒီတောင်းဆိုချက်ကို ထည့်သွင်းစဉ်းစားခြင်းမရှိဘူးဆိုရင် THA အနေနဲ့ စီမံခန့်ခွဲရေးတရားရုံးကို တရားဝင်အသနားခံစာ တင်သွင်းသွားမှာဖြစ်တယ်လို့ သိရပါတယ်။
သတင်း – Thenation
