ထိုင်းနိုင်ငံရဲ့ ရာသီဥတုဟာ လေထုဖိအားစနစ် နှစ်ခုကြောင့် သိသိသာသာ ပြောင်းလဲလာပြီလို့ ထိုင်းမိုးလေဝသဌာန (TMD) က ဒီနေ့မှာ သတင်းထုတ်ပြန်လိုက်ပါတယ်။ တရုတ်နိုင်ငံကနေ ဝင်ရောက်လာတဲ့ လေဖိအားများစနစ်ဟာ အရှေ့မြောက်နဲ့ မြောက်ပိုင်းဒေသတွေကို ကျော်လွန်ပြီး ဗဟိုနဲ့ အရှေ့ပိုင်းဒေသတွေအထိ ရောက်ရှိလာမှာပါ။
ဒီအကျိုးသက်ရောက်မှုကြောင့် လေအေးတွေ ဝင်ရောက်လာပြီး နိုင်ငံအထက်ပိုင်း (မြောက်၊ အရှေ့မြောက်၊ ဗဟိုနဲ့ အရှေ့ပိုင်း) ဒေသတွေမှာ သိသိသာသာ အေးမြ လာမှာပါ။ အပူချိန်တွေ ကျဆင်းပြီး နံနက်ခင်းတွေမှာ အေးစိမ့်နေမှာဖြစ်ပြီး လေပြင်းတွေပါ တိုက်ခတ်နိုင်တယ်လို့ ခန့်မှန်းထားပါတယ်။ ဘန်ကောက်မြို့တော်အပါအဝင် မြေပြန့်ဒေသတွေမှာပါ အအေးဓာတ် ခံစားရမှာဖြစ်ပြီး တောင်ပေါ်ဒေသတွေမှာဆိုရင်တော့ အရမ်းအေးတဲ့ အခြေအနေ တွေအထိ ဖြစ်ပေါ်နိုင်ပါတယ်။ဒါကြောင့် TMD က ပြည်သူတွေကို ကျန်းမာရေးအတွက် ကြိုတင်ပြင်ဆင်ဖို့နဲ့ အအေးဒဏ်ကာကွယ်ဖို့ တိုက်တွန်းထားပါတယ်။
တစ်ချိန်တည်းမှာပဲ တောင်ပိုင်းဒေသတွေမှာတော့ အရှေ့မြောက်မုတ်သုံလေဟာ အားကောင်းလာတာကြောင့် မိုးကြီးခြင်းမှ အလွန်မိုးကြီးခြင်းတွေအထိ နေရာကွက်ကျား ရွာသွန်းနိုင်ပါတယ်။ မိုးကြိုးမုန်တိုင်းတွေလည်း နေရာအနှံ့ ဖြစ်ပေါ်နိုင်တာကြောင့် ရေကြီးရေလျှံမှုများ ကို သတိပြုဖို့ မိုးလေဝသဌာနက သတိပေးထားပါတယ်။
ဒီလို မုတ်သုံလေ အားကောင်းလာတဲ့အတွက် ထိုင်းပင်လယ်ကွေ့နဲ့ တောင်ပိုင်းပင်လယ်ပြင်ဟာ အလွန်ကြမ်းတမ်း နေမှာပါ။ လှိုင်းအမြင့်တွေဟာ အန္တရာယ်ရှိတဲ့အဆင့်အထိ မြင့်တက်လာနိုင်တာကြောင့် ပင်လယ်ကူးတဲ့ သင်္ဘောတွေ၊ လှေငယ်တွေအနေနဲ့ အထူးသတိထားဖို့နဲ့ အခြေအနေမကောင်းမချင်း ကမ်းပေါ်မှာသာ ဆက်လက်ရပ်နားထားဖို့ TMD က အလေးအနက် သတိပေးထားပါတယ်။
သတင်း – The Nation
