ထိုင်းနိုင်ငံ တောင်ပိုင်းမှာ မကြာသေးခင်က ဖြစ်ပွားခဲ့တဲ့ ရေကြီးရေလျှံမှုတွေနဲ့ ပတ်သက်ပြီး အစိုးရကို တရားစွဲဖို့ နာမည်ကြီး ရှေ့နေနဲ့ တက်ကြွလှုပ်ရှားသူဖြစ်တဲ့ ရွန်နာရောင်း ကဲဝ်ဖက်ချ်က ရေဘေးသင့်ပြည်သူတွေကို တိုက်တွန်းလိုက်ပါတယ်။မစ္စတာ ရွန်နာရောင်းရဲ့ ပြောဆိုချက်အရ ရေဘေးသတိပေးချက်တွေ နောက်ကျတာ၊ စီမံခန့်ခွဲမှု ညံ့ဖျင်းတာနဲ့ အခြေခံအဆောက်အအုံတွေ ချို့ယွင်းခဲ့တာတွေအတွက် နိုင်ငံတော်မှာ တာဝန်ရှိတယ်လို့ ဆိုပါတယ်။
ဒါကြောင့် စီးပွားရေး အချက်အချာကျတဲ့ ဟတ်ယိုင် အပါအဝင် ရေဘေးဒဏ်ခံခဲ့ရသူတွေဟာ လျော်ကြေးရဖို့ နိုင်ငံတော်ကို တရားဥပဒေအရ စွဲဆိုနိုင်တယ်လို့ သူက ရှင်းပြပါတယ်။ မစ္စတာ ရွန်နာရောင်းက ရေကြီးမယ့်အန္တရာယ်ကို အစိုးရအေဂျင်စီတွေက လျှော့တွက်ခဲ့ကြတဲ့အတွက် အချိန်မီ သတိပေးချက် မပေးနိုင်ခဲ့ဘူးလို့ ထောက်ပြပါတယ်။ ဒါကြောင့် ဒေသခံတွေဟာ ကြိုတင်ပြင်ဆင်ဖို့နဲ့ ဘေးလွတ်ရာကို ရွှေ့ပြောင်းဖို့ အချိန်မရခဲ့ကြပါဘူး။
ဒေသခံတွေ ယုံကြည်အားထားရတဲ့ ဟတ်ယိုင် စည်ပင်သာယာက အစပိုင်းမှာ အခြေအနေ ဘေးကင်းပါတယ်လို့ အာမခံခဲ့တာကြောင့် လူတွေ ပေါ့ဆသွားပြီး ဘေးလွတ်ရာကို မရွှေ့ဘဲ နေအိမ်တွေမှာပဲ ပစ္စည်းတွေရွှေ့ပြီး နေခဲ့ကြတယ်လို့ သူက စွပ်စွဲပါတယ်။တာဝန်ရှိသူတွေရဲ့ ပေါ့ဆမှု ဒါမှမဟုတ် သတိပေးမှုတွေ နောက်ကျတာ၊ မလုံလောက်တာတွေကို သက်သေပြနိုင်ရင် နိုင်ငံတော်ကို တရားစွဲဆိုနိုင်တယ်လို့ ရှေ့နေက ပြောပါတယ်။
ရေစနစ် စီမံခန့်ခွဲမှုမှာလည်း ရေတံခါးတွေ လည်ပတ်မှု မမှန်တာ၊ ရေနုတ်မြောင်းတွေ ထိန်းသိမ်းမှု အားနည်းတာ၊ မြောင်းတွေ ပိတ်ဆို့နေတာနဲ့ ရေစုပ်စက်တွေ အလုပ်မလုပ်တာလိုမျိုး ရေစီမံခန့်ခွဲမှု ညံ့ဖျင်းခဲ့ကြောင်း သက်သေပြနိုင်ရင်လည်း နိုင်ငံတော်ကို တရားစွဲနိုင်တယ်လို့ သူက ပြောပါတယ်။ ဗူရာဖာ တက္ကသိုလ်က နိုင်ငံရေးသိပ္ပံ ပါမောက္ခ အိုလန်ကတော့ ဒီရေဘေးဟာ ဒေသခံအရာရှိ တစ်ဦးတည်းရဲ့ အားနည်းချက်မဟုတ်ဘဲ ဆယ်စုနှစ်တွေကြာအောင် ဗဟိုချုပ်ကိုင်ထားတဲ့ အုပ်ချုပ်ရေးစနစ်ရဲ့ အရင်းခံ ဖွဲ့စည်းပုံဆိုင်ရာ ပြဿနာဖြစ်တယ်လို့ သုံးသပ်ထားကြောင်း Bangkok post သတင်းက ဖော်ပြပါတယ်။
