စုန်ခလာပြည်နယ်၊ ဟတ်ယိုင်မြို့မှာ နိုဝင်ဘာ ၂၆ ရက်နေ့ မနက်ပိုင်းက ကလေးမွေးဖွာခါနီး မြန်မာအမျိုးသမီးတစ်ဦးကို ဘေးအန္တရာယ်ကာကွယ်ရေးဌာနက အချိန်မီ ကူညီကယ်ဆယ်ကာ ဆေးရုံသို့ပို့ဆောင်ပေးနိုင်ခဲ့တယ်လို့ သိရပါတယ်။ မနက် ၇:၁၅ နာရီမှာ ဗဟိုဘေးအန္တရာယ် ကာကွယ်ရေးဌာနကို ဒေသခံတွေကနေ အကူအညီတောင်းခံခဲ့ကြတာပါ။
အကြောင်းရင်းကတော့ ဟတ်ယိုင်မြို့နယ်က တောင်ကုန်းရွာတစ်ရွာမှာ နေထိုင်တဲ့ မြန်မာအမျိုးသမီးတစ်ဦးဟာ ကလေးမွေးဖွားခါနီးဖြစ်ပြီး ရေကြီးမှုကြောင့် လမ်းတွေ ပြတ်တောက်နေလို့ ဆေးရုံသွားလို့မရဘဲ ပိတ်မိနေတာပါ။ အဲ့ဒီအမျိုးသမီးဟာ ထိုင်းစကားကို ကောင်းကောင်းမပြောနိုင်တာကြောင့် ဘာသာပြန်အကူအညီနဲ့ ညှိနှိုင်းခဲ့ရတယ်လို့ သိရပါတယ်။
သတင်းရတာနဲ့ ချက်ချင်းပဲ ဘေးအန္တရာယ်ကာကွယ်ရေးနှင့် သက်သာရာရရှိရေးဌာန (DDPM) ဒုတိယ ညွှန်ကြားရေးမှူးချုပ် မစ္စတာ ချိုင်ရတ် ကဲဝ်ဖိယင်ဖန် ကိုယ်တိုင် ဦးဆောင်ပြီး အနီးဆုံးဖြစ်တဲ့ လေတပ်စခန်း ၅၆ ဆေးရုံနဲ့ ချက်ချင်း ဆက်သွယ်ညှိနှိုင်းခဲ့တယ်လို့ ဆိုပါတယ်။ မိုးတွေ သည်းထန်နေတဲ့ကြားက တာဝန်ရှိသူတွေဟာ ကင်းလှည့်ယာဉ်တစ်စီးနဲ့အတူ ရေများတဲ့လမ်းတွေကို ဖြတ်ကျော်ပြီး အဲဒီအမျိုးသမီးရှိရာကို အချိန်မီ ရောက်ရှိခဲ့တယ်လို့ သိရပါတယ်။
နောက်ဆုံးမှာတော့ ကိုယ်ဝန်သည်အမျိုးသမီးကို ဘေးကင်းစွာ ဆေးရုံသို့ ပို့ဆောင်နိုင်ခဲ့တယ်လို့ သိရပါတယ်။ လက်ရှိအချိန်မှာတော့ ဆရာဝန်တွေဟာ အဆိုပါ အမျိုးသမီးကို ဂရုတစိုက် စောင့်ရှောက်မှုတွေ ပေးနေပြီး မကြာခင် အန္တရာယ်ကင်းစွာ မွေးဖွားနိုင်မယ်လို့ ခန့်မှန်းရကြောင်း siamrath သတင်းမှာ ဖော်ပြထားပါတယ်။
