လုပ်သားတစ်ဦး ဘတ် ၁,၀၀၀ သာ ကျမည်
နိုင်ငံခြားသားလုပ်သား ခေါ်ယူတဲ့အခါ အလုပ်ရှင်တွေအနေနဲ့ ထားရတဲ့ အာမခံငွေကို ပြန်လည်ပြင်ဆင် လျှော့ချဖို့ ထိုင်းအစိုးရအဖွဲ့ (ကက်ဘိနက်) က သဘောတူလိုက်ကြောင်း အလုပ်သမားဝန်ကြီး ထရီနုချ် သီယန်ထောင်က ပြောကြားလိုက်ပါတယ်။
အာမခံငွေ အသစ် အနေနဲ့ နိုင်ငံခြားသားလုပ်သား တစ်ဦးကို ဘတ် ၁,၀၀၀ သာ ထားရှိရတော့မှာ ဖြစ်ပါတယ်။ ဒါ့အပြင် အလုပ်ရှင်တစ်ဦးအတွက် အများဆုံး ပေးချေရမယ့် ပမာဏကိုလည်း ဘတ် ၁၀၀,၀၀၀ ထက် မကျော်လွန်ရဘူးလို့ သတ်မှတ်လိုက်ပါတယ်။ဒီလို ပြင်ဆင်လိုက်တာဟာ အလုပ်ရှင်တွေနဲ့ လုပ်ငန်းရှင်တွေရဲ့ ဝန်ထုပ်ဝန်ပိုးကို လျှော့ချပေးဖို့ အဓိက ရည်ရွယ်ပါတယ်။ ဒီလိုစည်းကမ်းချက်တွေ အဆင့်ဆင့် ပြင်ဆင်နေတာ ဖြစ်တဲ့အတွက် ဘတ်အသစ်ရိုက်ပေးတဲ့လုပ်ငန်းစဉ် မကြာခင် အတည်ပြုပေးမယ်လို့လည်း နားလည်ရမှာ ဖြစ်ပါတယ်။
အလုပ်ရှင်တွေဟာ ပြန်ရလာတဲ့ အာမခံငွေတွေကို လုပ်ငန်းလည်ပတ်ရေးမှာ ပြန်လည်အသုံးပြုနိုင်ပြီး နိုင်ငံရဲ့ စီးပွားရေး တိုးတက်ဖို့အတွက်ပါ အထောက်အကူပြုစေမှာ ဖြစ်တယ်လို့ ဆိုပါတယ်။ ဒါပေမယ့် အလုပ်ရှင်တွေအနေနဲ့ နိုင်ငံခြားသားလုပ်သားကို မူရင်းနိုင်ငံကို ပြန်ပို့ရတဲ့အခါ ကုန်ကျစရိတ်ကိုတော့ တာဝန်ယူရမှာ ဖြစ်ပြီး ထားရှိထားတဲ့ အာမခံငွေထက် ပိုကုန်ရင်တောင် ကျခံရမှာ ဖြစ်ပါတယ်။
အလုပ်သမားဝန်ကြီးဌာနရဲ့ စစ်ဆေးရေးမှူးနဲ့ အလုပ်အကိုင်ရှာဖွေရေးဦးစီးဌာန ယာယီညွှန်ကြားရေးမှူးချုပ်က အစိုးရအဖွဲ့ သဘောတူပြီးပြီဖြစ်လို့ အဆိုပါ စီမံခန့်ခွဲမှုကို အကောင်အထည်ဖော်နိုင်ဖို့အတွက် မကြာခင်မှာ ဝန်ကြီးဌာန ကြေညာချက် ကို ထုတ်ပြန်သွားမှာဖြစ်ကြောင်း ပြောကြားခဲ့ပါတယ်။ ဒီကြေညာချက် စတင်အကျိုးသက်ရောက်တဲ့အခါ အလုပ်ရှင်တွေ တကယ်ပဲ သက်သာရာရသွားမယ်လို့လည်း ဆိုပါတယ်။
