ထိုင်းနိုင်ငံမှာ မိုးရာသီစတင်တာနဲ့အမျှ ကလေးတွေကြားမှာ အသက်ရှူလမ်းကြောင်းဆိုင်ရာရောဂါတွေဖြစ်တဲ့ တုပ်ကွေးနဲ့ RSV ဗိုင်းရပ်စ် ကူးစက်မှုတွေ သိသိသာသာ မြင့်တက်လာနေတယ်လို့ ထိုင်းပြည်သူ့ကျန်းမာရေးဝန်ကြီးဌာနက သတိပေးလိုက်ပါတယ်။
ပြီးခဲ့တဲ့တစ်ပတ်အတွင်း (စက်တင်ဘာ ၇ ရက်မှ ၁၃ ရက်) မှာ တုပ်ကွေးလူနာအသစ် ၃၀,၀၀၀ ကျော်နဲ့ RSV လူနာအသစ် ၃,၄၀၀ ကျော်အထိ ရှိလာခဲ့တယ်လို့ ရောဂါထိန်းချုပ်ရေးဦးစီးဌာန (DDC) ရဲ့ ညွှန်ကြားရေးမှူးချုပ်က ပြောပါတယ်။ ဒီနှစ်အစပိုင်းကနေဆိုရင် တုပ်ကွေးဖြစ်ပွားသူ စုစုပေါင်း ၅၅၅,၀၀၀ ကျော်ရှိနေပြီး သေဆုံးသူ ၅၉ ဦးရှိပြီလို့လည်း သိရပါတယ်။
အဓိကအန္တရာယ်ရှိတဲ့အုပ်စုကတော့ ကလေးငယ်တွေဖြစ်ပြီး တုပ်ကွေးက အသက် ၅ နှစ်ကနေ ၉ နှစ်ကြား ကလေးတွေမှာ အဖြစ်များပြီး RSV ဗိုင်းရပ်စ်ကတော့ အသက် ၄ နှစ်အောက် ကလေးငယ်တွေမှာ အများဆုံးဖြစ်ပွားနေတာကို တွေ့ရပါတယ်။ဒီရောဂါနှစ်မျိုးလုံးဟာ မိုးတွင်းမှာ အလွယ်တကူ ကူးစက်တတ်တာကြောင့် ကျောင်းတွေ၊ ကလေးထိန်းဌာနတွေလို လူစုလူဝေးနေရာတွေမှာ ရောဂါဖြစ်ပွားမှုတွေ ပိုမိုမြင့်တက်လာနိုင်တယ်လို့ ဒေါက်တာ Panumas က ရှင်းပြပါတယ်။
တုပ်ကွေးနဲ့ RSV ရဲ့ ကွာခြားချက်
ရောဂါလက္ခဏာတွေက ဆင်တူနိုင်ပေမဲ့ ကွဲလွဲမှုတချို့ရှိပါတယ်။
တုပ်ကွေး – ရုတ်တရက်ဖျားတာ၊ ကိုယ်လက်ကိုက်ခဲတာ၊ ချမ်းတုန်တာနဲ့ ချောင်းခြောက်ဆိုးတာတွေ ဖြစ်တတ်ပါတယ်။
RSV – ကလေးငယ်တွေမှာ အသက်ရှူမဝတာနဲ့ ရင်ကြပ်တာလိုမျိုး ပိုမိုပြင်းထန်တဲ့ လက္ခဏာတွေ ဖြစ်တတ်ပါတယ်။
ဘယ်လိုကြိုတင်ကာကွယ်ရမလဲ
- လူထူတဲ့နေရာတွေမှာ Mask တပ်ပါ။
- လက်ကို မကြာခဏ ဆေးပါ။
- ဖျားနာသူတွေနဲ့ နီးနီးကပ်ကပ် ထိတွေ့တာ ရှောင်ပါ။
- အရေးအကြီးဆုံးကတော့ ဖျားနေတဲ့ကလေးတွေကို ကျောင်းမပို့ဘဲ အိမ်မှာထားရှိဖို့ ဖြစ်ပါတယ်။
သတင်း – TheNation
