ထိုင်းနိုင်ငံ၊ ဘန်ကောက်မြို့ရှိ အသေးစား စက်ချုပ်လုပ်ငန်းတစ်ခုမှာ အလုပ်လုပ်ကိုင်နေတဲ့ မြန်မာအမျိုးသမီး ၃ ဦးဟာသူတို့ရဲ့ နေထိုင်ခွင့်စာရွက်စာတမ်းတွေကို အလုပ်ရှင်မှ သိမ်းဆည်းခံထားရပြီး အလုပ်မှထွက်ခွင့်မပေးဘဲ ခြိမ်းခြောက်ခံရတယ်လို့ သိရပါတယ်။ အခက်အခဲကို ကူညီဖြေရှင်းပေးဖို့ အလုပ်သမား မဟာမိတ်အဖွဲ့
M.H.A.C ကို အကူအညီတောင်းခံခဲ့တယ်လို့ သိရပါတယ်။
အလုပ်ရှင်ဖြစ်သူ မြန်မာလူမျိုးတစ်ဦးဟာ အလုပ်သမားတွေရဲ့ ပိုင်ဆိုင်မှုဖြစ်တဲ့ နေထိုင်ခွင့် စာရွက်စာတမ်းတွေကို သိမ်းဆည်းထားပြီး အလုပ်ချိန်ပိုတွေ အဓမ္မခိုင်းစေခဲ့တယ်လို့ သိရပါတယ်။ ဒါ့အပြင် အလုပ်ပိတ်ရက်တွေမှာ အပြင်ထွက်တာကို ခွင့်မပြုဘဲ ဆဲဆိုကြိမ်းမောင်းတာတွေပါ ပြုလုပ်ခဲ့တယ်လို့ အလုပ်သမားတစ်ဦးက ပြောပြပါတယ်။
“စာရွက်စာတမ်းက ကျွန်မတို့ပိုက်ဆံနဲ့ လုပ်ထားရတာ။ ဒါပေမဲ့ ပေးမကိုင်ဘူး။ အလုပ်ကလည်း ခိုင်းချင်သလို ခိုင်းတယ်။ ထွက်မယ်ဆိုရင်လည်း ဒီကပစ္စည်းတွေ ခိုးသွားတယ်ဆိုပြီး ရဲတိုင်မယ်လို့ ခြိမ်းခြောက်တယ်။ အဲ့ဒီကနေ ထွက်ချင်တာ၊ စာရွက်စာတမ်းလေးတွေ ပြန်ရရင်ရပြီ” လို့ အဆိုပါ အလုပ်သမားအမျိုးသမီးက ပြောပါတယ်။
ဒီအခြေအနေကြောင့် အလုပ်သမားတွေဟာ M.H.A.C (မဟာမိတ်အဖွဲ့) ကို အကူအညီတောင်းခံခဲ့တာဖြစ်ပါတယ်။ ဒါကြောင့် M.H.A.C အဖွဲ့နဲ့အတူ NUG အစိုးရရဲ့ အလုပ်သမားဝန်ကြီးဌာနက တာဝန်ရှိသူတစ်ဦး ပူးပေါင်းပြီး ကူညီဆောင်ရွက်ပေးခဲ့ရာမှာ အဓမ္မသိမ်းဆည်းခံထားရတဲ့ စာရွက်စာတမ်းတွေကို အောင်မြင်စွာ ပြန်လည်ရရှိခဲ့တယ်လို့ သိရပါတယ်။
