စာမွတ်ဆာခွန်မြို့နယ်က အစားအသောက်လုပ်ငန်းတစ်ခုမှာ ဇူလိုင်လ ၅ ရက်နေ့က အလုပ်သမားတွေရဲ့လစာကို တစ်လစာလျှင် ၃ဖြတ်ဖြတ်ပေးတဲ့အပြင် လစာအပြည့်အဝမရတာက အဆင်မပြေကြောင်းနဲ့ ယခင်လကျန်တဲ့ လုပ်ခလစာတွေကို ပြန်ထုတ်ပေးဖို့ သူဌေးကိုတောင်းဆိုခဲ့တာကြောင့် မြန်မာအလုပ်သမား ၉ ဦး အလုပ်ထုတ်ခံလိုက်ရတယ်လို့ သိရပါတယ်။
အလုပ်ရုံအနေနဲ့ လုပ်ခလစာကို ၁၅ ရက်တစ်ဖြတ်ခွဲပြီးပေးနေရာမှ အလုပ်သမားတွေရဲ့သဘောဆန္ဒမပါပဲ တစ်လလျှင် သုံးဖြတ်ခွဲပြီး ထုတ်ပေးဖို့ စီစဉ်ခဲ့တာဖြစ်ပါတယ်။
လစာအပြည့် မရတဲ့ အတွက်လလည်း အဆင်မပြေကြောင်းနဲ့ လက်ကျန်လစာတွေထုတ်ပေးဖို့ ပြောဆိုရာမှ အလုပ်ထုတ်ခံလိုက်ရတယ်လို့ဆိုပါတယ်။ဒါ့အပြင် သူဌေးအနေနဲ့ အလုပ်သမားတွေကို လုပ်ငန်းခွင်ဆူပူအောင်လုပ်တယ်ဟုဆိုကာ သူဌေးပြောင်းလက်မှတ် ဘိုင်ကျန့်အော်လဲ ထုတ်မပေးပဲ အခြားသူဌေးတွေထံမှာလည်း အလုပ်လုပ်ခွင့်မရအောင်လုပ်မယ်ဆိုပြီး ခြိမ်းခြောက်ခဲ့တယ်လို့ သိရပါတယ်။
“အလုပ်သမားတွေအနေနဲ့ လုပ်ခလစာအပြည့်ရရှိဖို့ ကောင်းကောင်းမွန်မွန်ပြောဆိုပေမယ့် အခုလိုခြိမ်းခြောက် အလုပ်ထုတ်ခံလိုက်တာကြောင့် အခွင့်အရေးတွေပြန်လည်ရရှိဖို့ လာရောက်အကူအညီတောင်းခံခဲ့ကြတာပါလို့ ” MHAC မှ တာဝန်ရှိသူတစ်ဦးကပြောပြပါတယ်။
အလုပ်သမားတွေအနေနဲ့ ဘိုင်ကျန့်အော်ရရန်နဲ့ လုပ်သက်အလိုက်နစ်နာကြေးရရှိဖို့အတွက် MHAC မှတာဝန်ရှိသူတွေက အလုပ်သမားတွေနဲ့အတူ သက်ဆိုင်ရာ စဝတ်ဒီကန်အလုပ်သမားကာကွယ်ရေးရုံးမှာ တိုင်ချက်ဖွင့်ပေးခဲ့တယ်လို့ သိရပါတယ်။
အလုပ်သမားတွေအနေနဲ့ အပြစ်တစုံတရာ မရှိပဲ အလုပ်ရှင်ဘက်က အကြောင်းမဲ့အလုပ်ထုတ်ခံရတဲ့အခါ အလုပ်ရှင်အနေနဲ့ ဥပဒေအရ ဒဏ်ငွေ ဘတ် ၂၀၀,၀၀၀ အထိ ကနေ ထောင်ဒဏ် တစ်နှစ်အထိ ချမှတ်ခံရနိုင်ပါတယ်။
