ဒီဇင်ဘာ ၃၁ ထိ အကျုံးဝင်မည်
ထိုင်းနိုင်ငံ လူဝင်မှုကြီးကြပ်ရေးဌာနက တောင်ပိုင်းဒေသ ရေဘေးကြောင့် ပိတ်မိနေပြီး သတ်မှတ်ရက်အတွင်း နိုင်ငံပြင်ပကို မထွက်နိုင်တဲ့ နိုင်ငံခြားသားခရီးသွားတွေ အတွက် နေထိုင်ခွင့်ကျော်လွန်မှု (Overstay) ဒဏ်ကြေး တစ်ရက် ဘတ် ၅၀၀ ကောက်ခံခြင်းကို ကင်းလွတ်ခွင့် ပေးလိုက်တယ်လို့ သိရပါတယ်။ ထိုင်းနိုင်ငံတောင်ပိုင်းမှာ လက်ရှိကြုံနေရတဲ့ ပြင်းထန်တဲ့ ရေကြီးရေလျှံမှု အခြေအနေဟာ ခရီးသွားတွေကိုပါ ထိခိုက်စေခဲ့ပါတယ်။
အထူးသဖြင့် ဆုန်ခလာ နဲ့ အနီးနားဒေသတွေမှာဖြစ်ပြီး ဟတ်ယိုင် လို နေရာမျိုးမှာဆို နိုင်ငံခြားသား ခရီးသွားအများအပြားဟာ လမ်းပန်းဆက်သွယ်ရေး ပြတ်တောက်လို့ နိုင်ငံပြင်ပကို ပြန်မထွက်နိုင်ဘဲ ပိတ်မိနေကြပါတယ်။လူဝင်မှုကြီးကြပ်ရေးဌာနရဲ့ အကြီးအကဲတွေက ဒီကိစ္စကို မလွဲမရှောင်သာတဲ့ အခြေအနေ အဖြစ် သတ်မှတ် ကိုင်တွယ်ခဲ့ပြီး နိုင်ငံခြားသားတွေအတွက် စိုးရိမ်ပူပန်ကြောင်း ဖော်ပြခဲ့ပါတယ်။ ဒါ့ကြောင့် နိုဝင်ဘာ ၂၇ ရက်နေ့ကတည်းက အမိန့်တစ်စောင် အလျင်အမြန် ထုတ်ပြန်ကာ ရေဘေးကြောင့် တကယ်တမ်း ပိတ်မိနေပြီး နိုင်ငံကနေ ပြန်လည်ထွက်ခွာလိုသူ နိုင်ငံခြားသားတွေအတွက် Overstay ဒဏ်ကြေး ကောက်ခံခြင်းကို ကင်းလွတ်ခွင့် ပေးလိုက်တာ ဖြစ်ပါတယ်။
ဒီဒဏ်ကြေးကင်းလွတ်ခွင့်ပေးတဲ့ကာလဟာ နိုဝင်ဘာ ၂၀ ရက် ကနေ ဒီဇင်ဘာ ၃၁ ရက်နေ့ အထိ သက်ရောက်မှုရှိမှာပါ။အဓိကအားဖြင့် ရေဘေးအပြင်းအထန် ခံစားရတဲ့ တောင်ပိုင်းပြည်နယ် ၈ ခုဖြစ်တဲ့ ဆုန်ခလာ၊ နခွန်စီသမာရတ်၊ ဖတ်ထလွန်၊ ထရန်၊ စတူးလ်၊ ပတ်တာနီ၊ ယာလာ နဲ့ နရာဓိဝပ် တို့မှာ ပိတ်မိနေသူတွေအတွက် ဖြစ်ပါတယ်။ဒီလိုလုပ်ပေးတာဟာ တကယ်တမ်း အခက်အခဲကြုံနေရပြီး ဥပဒေကို ချိုးဖောက်ဖို့ ရည်ရွယ်ချက်မရှိသူတွေကို ကူညီဖို့ ဖြစ်တယ်လို့ ဆိုပါတယ်။
