ထိုင်းမှာလည်း အွန်လိုင်းက လိမ်လည်တာတွေ အလွန်များပြားပါတယ်။ အခုနောက်ပိုင်းမှာ ဖုန်းနံပါတ်စိမ်းတွေ၊ မက်ဆေ့ချ်တွေကနေ ကံထူးရှင် ဖြစ်ကြောင်း၊ ဆုတွေရကြောင်း၊ ဒါမှမဟုတ် ငွေပြန်အမ်းမယ် ဆိုပြီး လိမ်လည်တာတွေ များလာပါတယ်။ မသမာသူတွေရဲ့ သားကောင် မဖြစ်စေဖို့အတွက် ဒီအချက်တွေကို မလုပ်မိအောင် သတိထားဖို့ လိုကြောင်း ရဲတပ်ဖွဲ့က ထုတ်ပြန်ပေးထားပါတယ်။
Line မှာလွယ်လွယ်နဲ့ သူငယ်ချင်းမလုပ်နဲ့၊ မ add နဲ့
လိမ်လည်သူတွေဟာ သင့်ကို စိုးရိမ်အောင်၊ ဒါမှမဟုတ် စိတ်ဝင်စားအောင် အမျိုးမျိုးပြောပြီး အဆက်မပြတ် ဖိအားပေး ဆက်သွယ်ဖို့ ကြိုးစားပါလိမ့်မယ်။ သူတို့ Line ဒါမှမဟုတ် တခြား အက်ပ် (App) တွေမှာ ခေါ်ပြောဖို့ တောင်းဆိုလာရင် လုံးဝ လက်မခံပါနဲ့။ အဲဒီကနေတစ်ဆင့် သင့်ကို လှည့်စားပြီး အချက်အလက်ယူတာ၊ ဒါမှမဟုတ် ငွေညှစ်တာတွေ လုပ်လာနိုင်ပါတယ်။
SMS ၊ မက်ဆေ့ချ်တွေကနေ ပို့လာတဲ့ Link တွေကို မနှိပ်ပါနဲ့
ဆုရတယ် ၊ အခွန်ပြန်အမ်းမယ်၊ ကူပွန်ရမယ် စတဲ့ ခေါင်းစဉ်မျိုးစုံနဲ့ လင့်ခ်တွေ ရောက်လာရင် ဘယ်တော့မှ နှိပ်မကြည့်ပါနဲ့။ အဲဒီလင့်ခ်တွေဟာ သင့်ရဲ့ အချက်အလက်တွေကို ခိုးယူသွားမယ့် ဝက်ဆိုက် တွေ၊ ဒါမှမဟုတ် သင့်ဖုန်းကို အဝေးကနေ ထိန်းချုပ်နိုင်မယ့် ဗိုင်းရပ်စ် ပါတဲ့ အက်ပ်တွေကို အလိုအလျောက် install လုပ်ခိုင်းတဲ့ လမ်းကြောင်းတွေ ဖြစ်နိုင်ပါတယ်။
ခြိမ်းခြောက်ပြီး ငွေလွှဲခိုင်းနိုင်တယ်၊ မလွှဲပါနဲ့
အကယ်၍ သင့်ကို ရာဇဝတ်မှုမှာ ပါဝင်နေတယ်၊ မူးယစ်ဆေးဝါးနဲ့ ပတ်သက်နေတယ် ဒါမှမဟုတ် သင့်အကောင့်က အလွဲသုံးစားလုပ်ခံထားရတဲ့ အကောင့် (Mule Account) ဖြစ်နေတယ်လို့ ပြောပြီး စစ်ဆေးဖို့ ငွေလွှဲပြရမယ်လို့ တောင်းဆိုလာရင် မယုံကြည်ပါနဲ့ ။ အစိုးရဌာန၊ ဘဏ် နဲ့ တရားဝင် အဖွဲ့အစည်း တွေက အပြစ်ကင်းကြောင်း သက်သေပြဖို့ သင့်ကို ငွေလွှဲခိုင်းမှာ မဟုတ်ပါဘူး။ သံသယရှိရင် သက်ဆိုင်ရာ ဌာနကို ကိုယ်တိုင် သွားရောက် ဆက်သွယ် စုံစမ်းပါ။
အတည်မပြုရသေးတဲ့ အချက်အလက်တွေကို လွယ်လွယ် မယုံကြည်ပါနဲ့။
မသမာသူတွေရဲ့ “ ဘယ်ဌာနကပါ ၊ ဘယ်ဘဏ်ကပါ ” လို့ ပြောဆိုလာတဲ့ ပြောဆိုချက်တွေကို အလွယ်တကူ မယုံပါနဲ့။ အချက်အလက် မှန်ကန်ကြောင်းကို သက်ဆိုင်ရာ တရားဝင် အဖွဲ့အစည်းရဲ့ ရုံးဖုန်းနံပါတ် သို့မဟုတ် တရားဝင် ဝက်ဘ်ဆိုဒ်၊ ချန်နယ်ကနေတစ်ဆင့် သေချာ စစ်ဆေးပါ။ ဖုန်းပေါ်မှာ ရင်းနှီးမြှုပ်နှံမှုတွေ၊ ဒါမှမဟုတ် ငွေကြေးဆိုင်ရာ ကိစ္စတွေ လုံးဝ မလုပ်ဆောင်ပါနဲ့။ လျှို့ဝှက်ကုဒ်၊ ဘဏ်အကောင့် အချက်အလက်တွေကိုလည်း ဘယ်သူ့ကိုမှ မပြောပဲ လုံခြုံအောင်ထားပါ။
