ထိုင်းဗဟိုဘဏ်မှ ဘတ် ၅၀ နဲ့ ဘတ် ၁၀၀ တန် ပေါ်လီမာ ငွေစက္ကူသစ်များ ယနေ့ စတင်ထုတ်ဝေ

ဘဏ်တွေ နဲ့ ATM စက်များမှ ထုတ်ယူနိုင်

ထိုင်းဗဟိုဘဏ် (BOT) က ပိုမိုတာရှည်ခံပြီး သန့်ရှင်းတဲ့ ဘတ် ၅၀ နဲ့ ဘတ် ၁၀၀ တန် ပေါ်လီမာငွေစက္ကူအသစ်တွေကို ဒီနေ့ နိုဝင်ဘာ ၂၁ရက်နေ့ကစပြီး ဘဏ်တွေကနေ ထုတ်ယူသုံးစွဲနိုင်ပြီလို့ ကြေညာလိုက်ပါတယ်။ပေါ်လီမာ (Polymer) ဆိုတာ အထူးထုတ်လုပ်ထားတဲ့ ပလတ်စတစ်အမျိုးအစားဖြစ်ပြီး သူ့ရဲ့ အဓိကအားသာချက်ကတော့ ရေ၊ ဆီ၊ ချွေးနဲ့ ဖုန်မှုန့်တွေကို စုပ်ယူတာမျိုးမရှိလို့ စက္ကူပိုက်ဆံထက် သုံးစွဲမှုဒဏ်ကို ပိုခံနိုင်ရည်ရှိပါတယ်။ 

အရင် ဘတ် ၂၀ တန်လိုပဲ ဒီအသစ်တွေက ပျမ်းမျှ ၈ နှစ် အထိ ခံနိုင်ရည်ရှိလို့ စက္ကူငွေစက္ကူထက် ၄ ဆ ပိုကြာပါတယ်။ ဒါ့အပြင် ပိုက်ဆံလဲလှယ်ထုတ်လုပ်ရမှု လျော့ကျသွားတဲ့အတွက် ကုန်ကျစရိတ်တွေ သက်သာပြီး သယံဇာတတွေကိုလည်း ထိန်းသိမ်းရာရောက်ပါတယ်။ ဒီပေါ်လီမာပိုက်ဆံတွေဟာ လက်ရှိသုံးနေတဲ့ စက္ကူငွေစက္ကူတွေနဲ့ ပုံပန်းသဏ္ဌာန်ချင်း တူညီပေမယ့် အတုအပ လုပ်မရအောင် နည်းပညာအမြင့်ဆုံး လုံခြုံရေးအမှတ်အသားတွေ ထည့်သွင်းထားပါတယ်။

ဖောက်ထွင်းမြင်ရတဲ့ ပြတင်းပေါက်

• ငွေစက္ကူရဲ့ နှစ်ဘက်လုံးကနေ လုံးဝဖောက်ထွင်းမြင်ရတဲ့ ကြည်လင်တဲ့ အကွက်တစ်ခု ပါဝင်ပါတယ်။

ဖောင်းကြွ

• အဲဒီကြည်လင်တဲ့ အကွက်လေးထဲမှာ ငွေတန်ဖိုးကို ဖောင်းကြွအောင် ရိုက်နှိပ်ထားတာ တွေ့ရပါလိမ့်မယ်။အမြင်အာရုံချို့ယွင်းသူများအတွက်ဖောင်းကြွအမှတ်အသားနဲ့ အနားသတ်မှာ ထောင့်ဖြတ်ဖောင်းကြွမျဉ်းကြောင်းလေးတွေ ထည့်သွင်းထားပါတယ်။ 

အရောင်ပြောင်းမှင်

• အလင်းရောင်ထဲမှာ စောင်းကြည့်လိုက်တဲ့အခါ အရောင်ပြောင်းသွားတဲ့ (သို့မဟုတ်) ရောင်ပြန်ဟပ်တဲ့ အထူးမှင်တွေနဲ့ ပုံနှိပ်ထားပါတယ်။

ပေါ်လီမာငွေစက္ကူအသစ်တွေကို ကုန်သွယ်ဘဏ်တွေနဲ့ ငွေရေးကြေးရေးအဖွဲ့အစည်းများအားလုံးမှ စတင်ထုတ်ယူနိုင်ပြီ ဖြစ်ပါတယ်။ ဘတ် ၁၀၀ တန် ကို ATM စက်တွေကတစ်ဆင့် ထုတ်ယူနိုင်မှာပါ။ အရင်အသုံးပြုခဲ့တဲ့ စက္ကူနဲ့ လုပ်ထားတဲ့ ဘတ် ၅၀ နဲ့ ၁၀၀ တန်တွေကိုလည်း ပုံမှန်အတိုင်း ဆက်လက်အသုံးပြုနိုင်ပါတယ်။

သတင်း – dailynews