ဘန်ကောက်မှာ ဘတ် ၄၀ နဲ့ တစ်ရက်လုံး အကန့်အသတ်မရှိ စီးနင်းနိုင်မယ့် နေ့စဉ်လက်မှတ် စနစ်ကို ထိုင်းနိုင်ငံရဲ့ သယ်ယူပို့ဆောင်ရေးဝန်ကြီးဌာနကမကြာခင် မိတ်ဆက်ပေးတော့ဖို့ ရှိနေပါတယ်။ ဒီနှုန်းထားအသစ်ကို ရဖို့အတွက် ခရီးသည်တွေဟာ EMV ကတ်လို့ ခေါ်တဲ့ ဘဏ်ကတ် ( contactless bank card ) တွေနဲ့သာ ငွေပေးချေရမှာ ဖြစ်ပါတယ်။
လက်ရှိ ခရမ်းရောင် နဲ့ အနီရောင် လျှပ်စစ်ရထားလိုင်းတွေမှာ သတ်မှတ်ထားတဲ့ တစ်ကြောင်းသွား ဘတ် ၂၀ နှုန်းထားဟာ နိုဝင်ဘာလ ၃၀ ရက်နေ့မှာ ပြီးဆုံးတော့မှာပါ။ ဒီလို နှုန်းထားပြောင်းလဲမှုမှာ အဆင်မပြေမှုမရှိရလေအောင် သယ်ယူပို့ဆောင်ရေးဝန်ကြီးဌာနက တစ်ရက်စာ ဘတ် ၄၀ တန် နေ့စဉ်လက်မှတ် စနစ်ကို ပြောင်းလဲကျင့်သုံးဖို့ ကက်ဘိနက်အစည်းအဝေးကို လာမယ့်အပတ်မှာ တင်ပြတော့မယ်လို့ သိရပါတယ်။
တစ်ရက်အတွင်းမှာ ဘတ် ၄၀ ပေးရုံနဲ့ ခရမ်းရောင်နဲ့ အနီရောင်လိုင်းတွေကို အကြိမ်ရေ ကန့်သတ်ချက်မရှိဘဲ စီးနင်းနိုင်မှာ ဖြစ်ပြီး ဘဏ္ဍာရေးဝန်ကြီးဌာနကလည်း ဒီအစီအစဉ်နဲ့ လိုအပ်မယ့် ဘတ်ဂျက်ကို သဘောတူထားပြီးသား ဖြစ်ပါတယ်။ ဒီစနစ်ဟာ မကြာခဏ အသွားအပြန် (သို့မဟုတ်) အကြိမ်များများ စီးနင်းသူတွေအတွက် အထူးသင့်တော်ပြီး ၄၀ ဘတ်က တစ်ရက် ခရီးအတွက် တွက်ခြေကိုက်စေမှာပါ။ အစိုးရအနေနဲ့ ဒီအစီအစဉ်အတွက် လိုအပ်မယ့် ထောက်ပံ့ကြေးငွေကို ၂၀၂၆ ခုနှစ် ဘဏ္ဍာရေးနှစ် ဗဟိုဘတ်ဂျက်ကနေ သုံးစွဲသွားမယ်လို့ သိရပါတယ်။
လက်ရှိမှာတော့ ဘတ် ၄၀ စနစ်ကို ခရမ်းရောင်နဲ့ အနီရောင်လိုင်း နှစ်ခုတည်းအတွက်သာ စတင်ကျင့်သုံးမှာ ဖြစ်ပါတယ်။ မြို့တော်တစ်ဝိုက်က ရထားလိုင်းအားလုံး (BTS/MRT) အတွက်ပါ တစ်ရက်စာ ဘတ် ၄၀ စနစ်ကို ကျင့်သုံးဖို့ကတော့ အဲဒီလိုင်းတွေရဲ့ လက်ရှိ လုပ်ငန်းလည်ပတ်ခွင့် စာချုပ်တွေကို ပြန်လည်ပြင်ဆင်ဖို့ အခက်အခဲရှိနေပါသေးတယ်။ အားလုံးပါဝင်တဲ့ ဘတ် ၄၀ စနစ်ဖြစ်လာဖို့အတွက် အစိုးရက ရထားလိုင်းတွေရဲ့ လုပ်ပိုင်ခွင့်ကို ပြန်လည်ဝယ်ယူဖို့ ရန်ပုံငွေ ထူထောင်တာမျိုးကိုပါ စဉ်းစားနေပြီး ဒီအတွက် ကုန်ကျစရိတ် စုစုပေါင်း ဘတ် ၁၀၀ ဘီလီယံ လောက်ရှိနိုင်မယ်လို့ ခန့်မှန်းထားကြောင်း bangkok post သတင်းက ဖော်ပြပါတယ်။
