အသက်ရှူကျပ် သေဆုံးသည်ဟု ယူဆ
ဘန်ကောက်မြို့၊ ထဝီဝပ်ထနာခရိုင်မှာရှိတဲ့ ဓာတ်ဆီဆိုင်တစ်ခုရဲ့ ကားပါကင်နေရာမှာ အဖြူရောင်ကားတစ်စီးအတွင်း လူသေအလောင်းတစ်လောင်း တွေ့ရှိခဲ့ကြောင်း ရဲတပ်ဖွဲ့က ဒီနေ့မှာ သတင်းထုတ်ပြန် လိုက်ပါတယ်။ သေဆုံးသူဟာ အသက် ၃၀ နှစ်အရွယ် မြန်မာနိုင်ငံသား ဦးချစ်ကိုနိုင် ဖြစ်ပြီး ဘန်ကပီခရိုင်က အထွေထွေ အလုပ်သမားတစ်ဦးဖြစ်တယ်လို့ သိရပါတယ်။ ကားကလည်း သေဆုံးသူပိုင်ဆိုင်တာဖြစ်ပြီး သူရဲ့ ရုပ်အလောင်းကို ကားမောင်းသူနေရာမှာ စတီယာရင်ကို ကိုင်ထားတဲ့ပုံစံနဲ့ တွေ့ရှိခဲ့ရတာပါ။
ဒီနေ့ နိုဝင်ဘာ ၁၉ ရက်နေ့မနက်ပိုင်းမှာ ကန်ချနာဖိဆေ့ လမ်းမပေါ်က ဓာတ်ဆီဆိုင်တစ်ခုရဲ့ ကားပါကင်မှာ တွေ့ရှိခဲ့တာလို့ သိရပါတယ်။ အနီးအနားက ပန့်ဝန်ထမ်းတွေဟာ ပြီးခဲ့တဲ့ ၂ ရက်လောက်ကတည်းက ကားကို သတိထားမိခဲ့ပေမဲ့ ပုံမှန်ဖောက်သည်တစ်ဦး ရပ်ထားတယ်လို့ပဲ ထင်ခဲ့ကြတာပါ။ ဒီမနက်မှာ ကားအနားကနေ အနံ့ဆိုးတွေ ရလာတဲ့အတွက် သွားရောက်ကြည့်ရှုမှ သေဆုံးနေတာကို သိပြီး ရဲကို အကြောင်းကြားခဲ့တာဖြစ်တယ်လို့ ဆိုပါတယ်။ ကားက မှန်တွေအကုန်တင် တံခါးတွေပိတ်ထားတဲ့ အခြေအနေဖြစ်ပြီး ကားအောက်ခြေမှာ အဝါရောင်အရည်တွေ စိမ့်ထွက်နေတာ တွေ့ရတယ်လို့ ဆိုပါတယ်။
သေဆုံးသူဟာ အဖြူရောင် ရှပ်အင်္ကျီနဲ့ ဂျင်းဘောင်းဘီတို ဝတ်ဆင်ထားပြီး ခန္ဓာကိုယ်မှာ ရုန်းကန်ဒဏ်ရာ ဒါမှမဟုတ် တိုက်ခိုက်ခံရတဲ့ လက္ခဏာမျိုး မတွေ့ရဘူးလို့ သိရပါတယ်။ CCTV မှတ်တမ်းတွေအရ အဆိုပါကားဟာ လွန်ခဲ့တဲ့ ၇ ရက်၊ နိုဝင်ဘာ ၁၃ ရက်၊ မနက် ၉:၁၃ နာရီ ကတည်းက ဒီနေရာမှာ လာရောက်ရပ်နားထားခဲ့တာ ဖြစ်ပါတယ်။ ကားသော့ဟာ စက်နှိုးထားတဲ့ အနေအထားမှာ ရှိနေပေမဲ့ အင်ဂျင်က ရပ်နေပါတယ်။ ရဲတပ်ဖွဲ့က ကနဦး ခန့်မှန်းချက်အရ ကားဆီကုန်သွားပြီးနောက် ကားအတွင်း လေအလုံပိတ်ကာ အသက်ရှူကျပ် သေဆုံးသွားတာ ဖြစ်နိုင်တယ်လို့ သုံးသပ်ထားပါတယ်။
ရဲတပ်ဖွဲ့ဟာ သေဆုံးသူရဲ့ အလောင်းကို ဘန်ကောက် ဆီရီရတ် ဆေးရုံရဲ့ မှုခင်းဆေးပညာဌာနကို အသေးစိတ် စစ်ဆေးမှုတွေ ထပ်မံပြုလုပ်ဖို့ ပေးပို့ထားတယ်လို့ ch7 သတင်းအရ သိရပါတယ်။
