တာ့ခ်ခရိုင်၊ ဖော့ဖရာမြို့နယ်၊ မြန်မာ-ထိုင်း နယ်စပ်ဒေသမှာ တရားမဝင် ဝင်ရောက်လာတဲ့ မြန်မာနိုင်ငံသား လူငယ်နှစ်ဦးကို နယ်စပ်လုံခြုံရေး တပ်ဖွဲ့ဝင်တွေက နိုဝင်ဘာ ၁၈ ရက်နေ့က ဖမ်းဆီးခဲ့တယ်လို့ သိရပါတယ်။ နယ်စပ်လုံခြုံရေး တာဝန်ယူထားတဲ့ အထူးတပ်ဖွဲ့ဟာ ဘန်မော်ကဲရ် ထိုင်း (Baan Mor Kher Thai) လုံခြုံရေး စစ်ဆေးရေးဂိတ်မှာ တာဝန်ထမ်းဆောင်နေစဉ် ဖမ်းဆီးမိခဲ့တာ ဖြစ်ပါတယ်။
ဖြစ်စဉ်မှာ အသက်အရွယ် ငယ်ရွယ်တဲ့ အမျိုးသားနှစ်ဦးဟာ လိမ္မော်ရောင်နဲ့ အနက်ရောင် ရောစပ်ထားတဲ့ Honda Wave ဆိုင်ကယ်ကို မောင်းနှင်လာခဲ့ကြတာ ဖြစ်ပါတယ်။ အဆိုပါ လူငယ်နှစ်ဦးရဲ့ မောင်းနှင်ပုံနဲ့ အမူအရာတွေက ပုံမှန်မဟုတ်ဘဲ သံသယဖြစ်ဖွယ် ထူးခြားနေတာကြောင့် တာဝန်ရှိသူတွေက စစ်ဆေးဖို့ ရပ်တန့်ခိုင်းခဲ့တာ ဖြစ်တယ်လို့ သိရပါတယ်။
စစ်ဆေးရာမှာ သူတို့နှစ်ဦးစလုံးဟာ မြန်မာနိုင်ငံသားတွေဖြစ်ပြီး ထိုင်းနိုင်ငံမှာ နေထိုင်ခွင့်နဲ့ သွားလာခွင့်အတွက် လိုအပ်တဲ့ သက်သေခံစာရွက်စာတမ်း ၊ နိုင်ငံသားမှတ်ပုံတင်ကတ် သို့မဟုတ် ယာယီနေထိုင်ခွင့် စာရွက်စာတမ်း တစ်ခုမှ မပြသနိုင်ခဲ့ကြဘူးလို့ သိရပါတယ်။
ဒါကြောင့် အထူးတပ်ဖွဲ့က တရားမဝင် ဝင်ရောက်မှုနဲ့ သံသယရှိသူ မြန်မာလူငယ်နှစ်ဦး နဲ့ သူတို့စီးနင်းလာတဲ့ ဆိုင်ကယ်ကို ထိန်းသိမ်းခဲ့တယ်လို့ သိရပါတယ်။ ဖမ်းဆီးရမိသူတွေနဲ့ သက်သေခံပစ္စည်းအားလုံးကို ဖော့ဖရာ ရဲစခန်းသို့ ဥပဒေနဲ့ အညီ ဆက်လက်အရေးယူ ဆောင်ရွက်နိုင်ရန် လွှဲပြောင်းပေးအပ်လိုက်ကြောင်း ထိုင်းရဲတပ်ဖွဲ့က ထုတ်ပြန်ထားပါတယ်။
