မြန်မာလုပ်သား ၂၇ ဦး လုပ်အားခမရပဲ  လက်မှတ်ထိုးခိုင်းပြီး  အလုပ်ထုတ်ခံရ 

၂နှစ် လုပ်သက်ရှိသူများလည်း ပါဝင်

ထိုင်းနိုင်ငံ၊ ရယောင် ပြည်နယ်ရှိ ကားအပိုပစ္စည်းထုတ်လုပ်တဲ့ စက်ရုံတစ်ခုမှာ မြန်မာရွှေ့ပြောင်းလုပ်သား ၂၇ ဦး လုပ်အားခ အပြည့်အဝ မရရှိဘဲ အလုပ်ထုတ်ခံခဲ့ရတယ်လို့ သိရပါတယ်။ လုပ်သားတွေဟာ လုပ်သက် ၅ လကနေ ၂ နှစ်အထိ ရှိကြတယ်လို့ ဆိုပါတယ်။ 

လုပ်သား ၂၇ ဦးကို စက်ရုံဘက်က လုပ်အားခတွေ မပေးဘဲ လက်မှတ်ထိုးခိုင်းပြီး အလုပ်ကနေ အကြောင်းမဲ့ ထုတ်ပယ် ခံခဲ့ရတယ်လို့ ဆိုပါတယ်။ ဒီလို အလုပ်သမားအခွင့်အရေး ချိုးဖောက်ခံရတဲ့အတွက် မြန်မာလုပ်သားတွေက MHAC အဖွဲ့ကို ဆက်သွယ်ခဲ့ကြတယ်လို့ သိရပါတယ်။

ဒါကြောင့် MHAC မဟာမိတ်အဖွဲ့က နိုဝင်ဘာလ ၁၈ ရက်နေ့မှာ မြန်မာလုပ်သားတွေနဲ့အတူ နယ်မြေခံ အလုပ်သမားကာကွယ်စောင့်ရှောက်ရေးရုံး (စဝါဒီကန်) ကို သွားရောက်ခဲ့တယ်လို့ သိရပါတယ်။ အဖွဲ့သားတွေနဲ့ အစိုးရဝန်ထမ်းတွေ ပူးပေါင်းပြီး လုပ်သားတွေရဲ့ ချိုးဖောက်ခံရတဲ့ အခွင့်အရေးတွေ ပြန်ရဖို့ ကူညီဆောင်ရွက်ပေးခဲ့တယ်လို့ ဆိုပါတယ်။

“သူတို့ရမယ့် လုပ်အားခက လုပ်သား ၂၇ ယောက် ကို ၁၅ ရက်စာ ရမယ့်သူကနေ ၁ လစာ၊ ၄၅ ရက်စာ အမျိုးမျိုးရှိကြတယ်။ တစ်ဦးနဲ့တစ်ဦးတော့ မတူကြဘူး။ လုပ်သက်ကတော့ ၂ နှစ်ကနေ ၅ လသမားအထိရှိပါတယ်။ လောလောဆယ်မှာတော့ ဒီလုပ်သားတွေအတွက် လစာနဲ့ အခွင့်အရေးတွေပြန်ရဖို့ စဝါဒီကန်ရုံးက တာဝန်ရှိလူကြီးတွေနဲ့ တွေ့ခဲ့ပြီ ” လို့ MHAC ရဲ့ တာဝန်ခံတစ်ဦးက ပြောပြပါတယ်။

MHAC မဟာမိတ်အဖွဲ့က ဒီမြန်မာလုပ်သား ၂၇ ဦးအတွက် အမှုပြီးဆုံးတဲ့အထိ လိုအပ်တဲ့ ကူညီဆောင်ရွက်မှုတွေကို ဆက်လက် ပေးသွားမယ် လို့  ထုတ်ပြန်ထားပါတယ်။