အလုပ်ရှင်လည်း ဥပဒေလိုက်နာဖို့ တာဝန်ရှိတယ်

ရွှေ့ပြောင်းအလုပ်သမားတွေအနေနဲ့ အခြေအနေအမျိုးမျိုးနဲ့ အခွင့်အရေး ချိုးဖောက်ခံရတာမျိုးတွေ ရှိနိုင်ပါတယ်။ ဥပမာ- လုပ်ခလစာ အပြည့်မရတာ၊ အန္တရာယ်ရှိတဲ့ လုပ်ငန်းခွင်မှာ လုပ်ရတာ၊ အဓမ္မခိုင်းစေခံရတာ ဒါမှမဟုတ် ခွဲခြားဆက်ဆံခံရတာ မျိုးတွေပါ။ 

ဒီလို အခွင့်အရေးတွေ ချိုးဖောက်ခံနေရပြီလို့ ခံစားရရင် အကူအညီရယူဖို့ အတွက် နည်းလမ်းတွေ အများကြီး ရှိပါတယ်။ 

ချိုးဖောက်ခံရရင်ဘာလုပ်ရမလဲ 

သက်သေစုဆောင်းပါ

• အလုပ်ခန့်စာချုပ်များ၊ အလုပ်ပါမစ်များ၊ လုပ်ခလစာစာရွက်တွေ နဲ့ ဓာတ်ပုံ အစရှိတဲ့ အရေးကြီးတဲ့  စာရွက်စာတမ်းတွေကို မိတ္တူကူးပြီး သိမ်းထားပါ။

ချိုးဖောက်မှုများကို တိုင်ကြားပါ

• အလုပ်သမားဝန်ကြီးဌာန ဒါမှမဟုတ် ပြည်နယ်အလုပ်သမားရုံးတွေမှာ တိုင်ကြားနိုင်ပါတယ်။ဘာသာစကားအခတ်အခဲကြောင့် ကိုယ်တိုင်သွားရောက်တိုင်ကြား ဖို့အဆင်မပြေတဲ့အခါ ရွှေ့ပြောင်းအလုပ်သမားတွေအတွက် ကူညီလုပ်ကိုင်ပေးနေတဲ့ အဖွဲ့အစည်းတွေနဲ့ ချိတ်ဆက်ပြီး အကူအညီတောင်းခံနိုင်ပါတယ်။ 

ပြစ်ဒဏ်

ထိုင်းနိုင်ငံမှာ အလုပ်ရှင်က အလုပ်သမားအခွင့်အရေး ချိုးဖောက်ရင် ပြင်းထန်တဲ့ ပြစ်ဒဏ်တွေ ရင်ဆိုင်ရနိုင်ပါတယ်။ ဒီပြစ်ဒဏ်တွေက ချိုးဖောက်မှုအမျိုးအစားနဲ့ အတိုင်းအတာအပေါ် မူတည်ပြီး ကွဲပြားပါတယ်။

ငွေဒဏ်

• လုပ်ခလစာ အပြည့်မပေးတာ၊ အချိန်ပိုကြေး မပေးတာ စတဲ့ကိစ္စတွေမှာ ဘတ်ငွေ ၅,၀၀၀ ကနေ ၂၀၀,၀၀၀ အထိ ဒဏ်ငွေဆောင်ရနိုင်ပါတယ်။
• ဘေးကင်းစိတ်ချရတဲ့ လုပ်ငန်းခွင်အခြေအနေတွေ မဖန်တီးပေးတာ ဒါမှမဟုတ် အလုပ်သမား ကာကွယ်ရေးဥပဒေကို မလိုက်နာတာတွေအတွက်လည်း ဒဏ်ကြေးတွေ ချမှတ်ခံရနိုင်ပါတယ်။

ထောင်ဒဏ်

တချို့ ပိုမိုပြင်းထန်တဲ့ ချိုးဖောက်မှုတွေအတွက်ဆိုရင် အလုပ်ရှင်ဟာ ထောင်ဒဏ် ပါ ကျခံရနိုင်ပါတယ်။ ဥပမာ –

• အလုပ်သမားတွေကို မတရားထုတ်ပယ်တာ၊ဥပဒေအရ ပေးသင့်တဲ့ အကျိုးခံစားခွင့် (ဥပမာ- ခွင့်ရက်၊ မီးဖွားခွင့်၊ နုတ်ထွက်ကြေး) တွေ မပေးတာ၊အလုပ်ချိန်နဲ့ အချိန်ပိုပေးရမယ့် စည်းမျဉ်းတွေကို မလိုက်နာတာ မျိုးတွေအတွက် တစ်နှစ်အထိ ထောင်ဒဏ် ဒါမှမဟုတ် ငွေဒဏ်နဲ့ ထောင်ဒဏ် နှစ်ခုစလုံး ကျခံရနိုင်ပါတယ်။
• အလုပ်သမားစစ်ဆေးရေးမှူးတွေရဲ့ အမိန့်ကို မလိုက်နာတာမျိုး ဆိုရင်လည်း တစ်နှစ်အထိ ထောင်ဒဏ် ဒါမှမဟုတ် ဘတ်ငွေ ၂၀,၀၀၀ အထိ ဒဏ်ငွေဒါမှမဟုတ် နှစ်ခုလုံး ကျခံရနိုင်ပါတယ်။

ထိုင်းနိုင်ငံမှာ ရွှေ့ပြောင်းအလုပ်သမားတွေအနေနဲ့ အခွင့်အရေးတွေ ချိုးဖောက်ခံရရင် ဥပဒေအရ ကာကွယ်ပေးထားတာတွေ ရှိပါတယ်။ ဒီဥပဒေတွေက ထိုင်းနိုင်ငံသားတွေလိုပဲ ဘေးကင်းတဲ့ လုပ်ငန်းခွင်၊ တရားမျှတတဲ့ လုပ်ခလစာ နဲ့ လူမှုဖူလုံရေး အကျိုးခံစားခွင့်တွေ ရရှိဖို့ အာမခံထားပါတယ်။

Ref : IOM / thailandlawlibrary